Memleket basshysy Qasym-Jomart Toqaev tarıhı jadymyzdy saqtaý men ata-baba erligine qurmet kórsetý máselesin únemi nazarda ustap keledi. Prezıdenttiń aıtýynsha, Jeńis kúni – árbir el azamatynyń júreginen erekshe oryn alatyn mereke. О́ıtkeni bul soǵys barlyq otbasynyń tarıhynda óz izin qaldyrǵany anyq.
Bıyl sondaı-aq qazaqtyń úsh birdeı dańqty qaharmanynyń mereıtoıy atap ótiledi: Baýyrjan Momyshulynyń týǵanyna – 115 jyl, Málik Ǵabdýllınge – 110 jyl, Álııa Moldaǵulovaǵa – 100 jyl. Bul datalar – qazaqstandyqtardyń soǵys jyldaryndaǵy erligin eske salyp, ony umytpaýǵa mindetteıdi.
Osy mańyzdy oqıǵalar qarsańynda «AMANAT» partııasy búkil respýblıka aýmaǵynda Uly Otan soǵysy batyrlaryna arnalǵan eskertkishterdi, memorıaldyq keshenderdi jáne basqa da tarıhı oryndardy abattandyrý boıynsha aýqymdy aksııaǵa bastamashy boldy. Igi isti alǵash bolyp Pavlodar oblysynyń partııa músheleri qolǵa aldy: oblystyq máslıhat depýtaty, «AMANAT» partııasy fraksııasynyń múshesi Aleksandr Terentev óz qarajaty esebinen Aqtoǵaı aýdanyndaǵy eskertkishti qalpyna keltirip, aınalasyn retteýge úles qosty.
«Tarıhı jadymyzdy saqtaý – ulttyq sana men patrıotızmniń negizi. Bizdiń partııa Uly Otan soǵysy batyrlarynyń erligin urpaq jadynda máńgi qaldyrý úshin júıeli túrde jumys atqaryp keledi. «Ardagerlerdi ardaqtaıyq», «Ulttyq mura» partııalyq jobalary, sondaı-aq «Taza beısenbi» ekologııalyq aksııasy aıasynda eskertkishter men memorıaldardy turaqty túrde retke keltirip otyramyz. Bul tek tazalyq máselesi emes, eń aldymen Otan úshin janyn qıǵan erlerge degen qurmet pen taǵzym. Barsha otandastardy osy ıgi iske atsalysýǵa shaqyramyn», deıdi A.Terentev.
Atalǵan bastamany elimizdiń ózge de aımaqtaryndaǵy partııa músheleri qoldady. Máselen, Aqmola oblystyq máslıhatynyń depýtaty Rýslan Shamkenov Jibek joly aýylyndaǵy Uly Otan soǵysy jaýyngerlerine arnalǵan dańq eskertkishin jóndeýdi bastaıtynyn málimdedi. Batys Qazaqstan oblysy Jánibek aýdandyq máslıhatynyń depýtaty Berik Yhsanov Jánibek aýylyndaǵy baýyrlastar zıratyn abattandyratynyn aıtty.
Aıta keteıik, «AMANAT» partııasy tarıhı jadymyzdy saqtaý jáne ardagerlerge qoldaý kórsetý máselesimen júıeli túrde aınalysyp keledi. «Ardagerlerdi ardaqtaıyq» jobasy aıasynda ardagerlerge kómek kórsetý, belsendi uzaq ómir súrý ortalyqtaryn ashý, soǵys batyrlary týraly kitaptar shyǵarý sekildi jumystar júzege asyp keledi. Máslıhattaǵy partııa depýtattarynyń arqasynda ardagerlerge merekelik tólemder men járdemaqylar taǵaıyndalyp, arnaýly úıler salynyp, medısınalyq tekserýler men mádenı is-sharalar uıymdastyrylyp jatyr.
Sonymen qatar byltyrdan beri partııa músheleri Memleket basshysynyń «Taza Qazaqstan» jalpyulttyq bastamasy aıasynda «Taza beısenbi» aksııasyn ótkizip keledi. Ár apta saıyn myńdaǵan adam kóshelerge shyǵyp, qoǵamdyq oryndardy, aýlalardy, saıabaqtar men skverlerdi, sonyń ishinde soǵysqa arnalǵan eskertkishterdi tazalap júr.
Igi bastama jergilikti jerlerde keń qoldaý tapty. Aqtóbe oblysy Hromtaý qalasynda partııa músheleri «Ana-Máńgilik» eskertkishiniń aınalasyn retke keltirdi.
«Bul eskertkish – el azattyǵy jolynda janyn qıǵan jaýyngerlerge jáne ómir joly bárimizge úlgi bolatyn ardagerlerge arnalǵan sheksiz alǵysymyzdyń belgisi. Memorıal aýmaǵyn taza ári tártippen ustaý – bárimizdiń ortaq boryshymyz», deıdi partııanyń Hromtaý aýdandyq fılıalynyń atqarýshy hatshysy Maıra Balqybaeva.
Qostanaı oblysy B.Maılın aýdanynda partııa belsendileri «Batyrlarǵa taǵzym» memorıaly mańynda tazalyq jumystaryn ótkizip, erlerge degen qurmetin kórsetti. Jergilikti turǵyndar mundaı is-sharalar jas urpaqty el qorǵaýshylardyń erligine taǵzym etýge tárbıeleıdi dep atap ótti.
Qaraǵandy oblysy Saran qalasynda partııa músheleri tyl eńbekkeri Halıma Ǵabdrahmanovany arnaıy baryp quttyqtady. Bıyl ol 101 jasqa toldy. Ol 1924 jyly Kırov oblysynda týǵan, 1950 jyldardyń basynda Qazaqstanǵa kóship kelgen. Soǵys jyldary Kúzembaev atyndaǵy shahtada jarýshy bolyp jumys istegen. Qazir Aktas kentinde turady. Jasyna qaramastan, Halıma áje áli de sergek, qonaqtardy qýana qarsy alady.
«Men qysqa kýrstan ótip, jarýshy boldym. Bul aýyr ári qaýipti jumys edi. 10 keli jarylǵysh zat, detonator, elektr kabeli, aýyr sham, akkýmýlıator, saz-balshyq, belgi ysqyryǵy – bárin tizerlep, eńbektep tasıtynbyz. Kez kelgen sátte taý jynysynyń qulap ketý qaýpi boldy», dep eske alady Halıma Ǵabdrahmanova.
Kezdesý barysynda partııa músheleri Halıma ájege soǵys jyldaryndaǵy qajyrly eńbegi úshin alǵystaryn bildirip, densaýlyq tiledi.
Shymkent qalasynda «Jastar Rýhy» jastar qanatynyń 50-ge jýyq belsendisi Abaı saıabaǵyndaǵy Uly Otan soǵysy ardagerleriniń qurmetine salynǵan «Dańq memorıaly» aýmaǵyn tazalap, senbilik ótkizdi. Bul keshende maıdan men tyl birliginiń sımvoly – «Dańq» eskertkishi, máńgilik alaý, Keńes Odaǵynyń Batyry atanǵan óńirdiń 51 jaýyngeri men Dańq ordeniniń tolyq ıegeri bolǵan 8 batyrdyń esimderi jazylǵan «Batyrlar sheńberi» ornalasqan. Sondaı-aq 140 myńnan astam shymkenttik pen Túrkistan oblysynyń týmasy – soǵysqa qatysqan sarbazdardyń esimi jazylǵan 200 metrlik «Dańq alleıasy» bar.
«Dańq memorıalyn tazalaý arqyly biz erlikpen qaza tapqan jaýyngerler men beıbit ómir syılaǵan ardagerlerge alǵysymyzdy bildiremiz. Jas urpaq óz batyrlaryn bilip, maqtan tutýy kerek. Patrıotızm – osyndaı qarapaıym isterden bastalady», deıdi «Jastar Rýhy» Shymkent qalalyq fılıalynyń tóraǵasy Bekzat Tolebaı.
Jetisý oblysy Kóksý aýdanynda da partııa músheleri men aýyl turǵyndary Balpyq bı aýylyndaǵy Músápbek Sengırbaev atyndaǵy saıabaqta senbilik ótkizdi. Shamamen 30 adam joldardy tazalap, Uly Otan soǵysy batyryna arnalǵan eskertkishti retke keltirdi.
«Bul saıabaq – jaýyngerlik erlikpen kózge túsken 28 panfılovshynyń biri – bizdiń jerlesimiz Musabek Seńgirbaevtyń esimimen atalady. Biz onyń erligin umytpaýymyz kerek. Partııanyń úndeýine jastardyń belsendi ún qatqany qýantady», deıdi jergilikti turǵyn Talǵat Ǵabdýllauly.
