Instıtýt 2019 jyly qurylǵan. Qazir onyń quramynda bes ortalyq bar: Sosıologııalyq zertteýler ortalyǵy, Otbasy jáne gender máselelerin zertteıtin ortalyq, Qoǵamdyq prosesterdi zertteıtin ortalyq, «Media Lab» ortalyǵy jáne Saraptamalyq-taldaý basqarmasy.
«Osy ýaqytqa deıin shamamen 200 tarta túrli deńgeıde, túrli formatta jáne túrli kólemdegi zertteýlerdi júrgizdik. Sosıologııalyq zertteýde kóp qoldanylatyn tásilder sandyq (jappaı saýalnama) men sapalyq sosıologııalyq zertteý. Sapalyq sosıologııalyq zertteýde tereńdetilgen suqbat jappaı saýalnama kórsete almaıtyn derekterdi alýǵa múmkindik beredi. Bul rette keńinen qoldanylatyn taǵy bir tásil – fokýs-toptyq talqylaýlar dep atalady. Ol jerde birneshe adam suraqtarǵa jaýap berý arqyly zertteýge qatysady. Saýalnama anonımdi túrde júrgiziledi», - dedi Nurbek Mátjanı.
QQDI iri zertteýleriniń ishinde «Qazaqstan Respýblıkasyndaǵy otbasylyq turmystyq zorlyq-zombylyqqa qarsy is-qımyl» dep atalatyn ulttyq baıandama bar. Onda otbasyndaǵy turmystyq zorlyq-zombylyqtyń sebep-saldary, zańdaǵy olqylyqtar, álemdik tájirıbe taldanady.
«Qazaqstan otbasylary» Ulttyq baıandamasyna toqtalatyn bolsaq, bul jerde otbasylyq model qalaı ózgerip jatyr, ata-ana men balanyń arasyndaǵy qarym-qatynas, eldegi ajyrasýǵa degen kózqaras kórsetiledi.
Zertteýlerdiń kóbi úsh tilde: qazaq, orys jáne aǵylshyn tilinde usynylady.
