Iá, ǵashyqtyq – uly sezim. Súıgenin tutas bolmysymen qabyldaýǵa júrektiń batyldyǵy qajet. Sezimge selkeý túsiretin nárseniń biri – sharttylyq. Hakimderden qalǵan hıkmet bar. Kún jerge jaryq berip turǵanyna qaı zaman? Sodan beri ol jerge kelip birde-bir ret: «qashanǵy saǵan jaryǵym men jylýymdy tóge beremin? Sen de bir ýaq shýaǵyńdy shashsańshy» dep aıta ma? Joq. Kúnniń mahabbaty – shartsyz. Topyraq ta sondaı. Onyń ústine kúl tókseń, gúl ósirip shyǵarady. Qazaq synyqtyqty topyraq minez dep ardaqtaıdy.
Hakim Abaı adamzatty, ádiletti jáne Allany súıgen adam «ımanı gúl» atty rýhanı dárejege jetip, tolyq adam bolatynyn aıtady. Qasıetti jazbalarda «kórinip turǵan baýyryńdy súımeı turyp, kórinbeıtin qudaıdy súıý múmkin emes» degen ǵaqlııa bar.
Sondyqtan adam eń áýeli óziniń otbasyn jaqsy-jaman qasıetine qaramaı, bar bolǵany úshin súıýi kerek. Odan soń týǵan halqyn, bar kemshiligimen jaqsy kórýi kerek. «Mazulymǵa janyń ashyp, ishiń kúısin» deıtin Abaı osy maǵynany ústeıdi. Osy eki zatty shartsyz, sheksiz súıe bilgen adam qudaıdy da jan-tánimen súıetin bolady.
