Depýtattyń aıtýynsha dástúrli emes medısına salasyn naqty zańnamalyq retteýdiń bolmaýy – jaqsy emes, bul – arnaýly medısınalyq bilimi joq adamdardyń emdeý isine aralasýyna jol ashyp, kórsetiletin qyzmet sapasyn tómendetedi, tipti, pasıentterdiń densaýlyǵyna qaýip tóndiredi.
«Dáleldenbegen, ıakı densaýlyqqa qaýipti emdeý ádisteri talaı keseldi asqyndyryp, qaıǵyly jaǵdaılarǵa dýshar etýi múmkin. Baqylaý men jaýapkershilik tetikteriniń joqtyǵy: pasıentke zııan keltirgen jaǵdaıda, jaýapkershilikke tartý jáne zardap shekkenderdiń quqyqtaryn qorǵaý úshin naqty mehanızmder joq», dedi senator.
Senator óz sózinde Qazaqstanda dástúrli emes medısınalyq qyzmetti retteıtin normalar 2006 jyly joıylǵannan keıin bul sala quqyqtyq keńistikten múlde tys qalǵanyn atap ótti.
«QR-nda pasıentterdiń qaýipsizdigin qamtamasyz etý jáne dástúrli emes medısına salasyndaǵy qyzmetterdiń sapasyn arttyrý úshin osy salany zańnamalyq retteý sharalaryn qabyldaýdy qarastyrý; lısenzııalaý jáne sertıfıkattaý júıesin engizý, dálelderge negizdelgen ruqsat etilgen ádister men praktıkalardyń tizilimin jasaý kerek. Bul azamattardyń densaýlyǵyn qorǵaýǵa, kórsetiletin qyzmetterdiń sapasyn arttyrýǵa jáne tıimdi ári qaýipsiz dástúrli emes medısına ádisterin kóleńkeli aımaqtan shyǵarýǵa múmkindik beredi», dep túıindedi Senat depýtaty Bıbigúl Jeksenbaı.
