Tergeý málimetinshe, asyrandy balalar ata-ana meıiriminiń ornyna qorlyq kórgen. Tamaq bermeı, únemi uryp-soǵyp, aqyry bireýin múgedek qylǵan.
Otbasynyń úsh múshesine qatysty azaptaý baby boıynsha aıyp taǵyldy.
Qarqaraly aýdanyna qarasty aýyldardyń birinde otbasy 2018 jyly otbasy tıpinde balalar úıin ashqan. Patranat tárbıege balalar úıinen alty jetkinshekti alady. Olardy birden malǵa salyp, qora‑qopsysyn qaratyp, qara jumysqa jekken. Qıt etse, kókala qoıdaı etip sabap, nár tatyrmaı qoıady eken.
Prokýror balalardyń botqasyna «maldyń tezegin qosyp bergen» degen derekterdi jetkizdi. Tipti olar dalada, ıttiń úıshiginde túnegen kezi de bolǵan.
«Balalarǵa kúnde qol jumsap otyrǵan. Túkke turmaıtyn qylyǵyna bola qamshymen sabap, kóseýmen ońdyrmaı uryp kelgen. Sonyń saldarynan balalardyń basy, beti, qol-aıaǵy tolǵan tyrtyq. Durys tamaqtanbaǵandyqtan, qatarlastaryna saı damyp-óspegen. Zor kúsh talap etetin qora-qopsynyń qara jumysynan shalalyq kórse, únemi judyryqtap kelgen», - deıdi prokýror Ádil Sadyqov.
Sarapshylar únemi taıaq jep kelgen balalardyń denesinen 19-dan 47-ge deıin tyrtyq anyqtaǵan. Eń kishisiniń tipti basyn jaryp tastapty. Jany áreń qalǵan onyń bas súıeginiń ornynda plastına salynypty. Aýdannyń qorǵanysh bólimi qaıda qaraǵany túsiniksiz.
Al alty balanyń tárbıesine aı saıyn tólenetin 300 myń teńgeni qysylmaı alyp kelgen. Qazir úsh bala týǵan ájesiniń qaraýyna berilgen. Qalǵan úsheýi balalar úıine qaıtarylyp, quldyqtan qutyldy.
