Foto: Aqorda
Basqarma tóraǵasynyń aıtýynsha, ótken jyly holdıng tarapynan 6 trıllıon teńgege jýyq qoldaý kórsetilgen. Onyń 4,1 trıllıon teńgesi iri, orta jáne shaǵyn bızneske, al 1,9 trıllıon teńgesi turǵyn úı-qurylys sektoryna baǵyttalǵan.
Qasym-Jomart Toqaevqa byltyr holdıngtiń aktıvteri 14,1 trıllıon teńgege jetkeni jóninde baıandaldy. Investısııalyq jáne nesıe portfeli 10,3 trıllıon teńgege deıin ulǵaıyp, taza tabys 416 mıllıard teńgeni qurady. «Báıterek» ulttyq basqarýshy holdıngi» AQ basqarma tóraǵasy Rýstam Qaraǵoıshınniń aıtýynsha, bul qarjyny holdıngtiń kompanııalar toby aıasyndaǵy baǵdarlamalardy iske asyrýǵa jumsaý josparlanyp otyr.
Qasym-Jomart Toqaevqa «Damý» kásipkerlikti damytý qory» bazasynda eki kepildik qory iske qosylǵany týraly málimet berildi. Onyń biri shaǵyn jáne orta bıznesti qoldaýǵa arnalǵan, al ekinshisi quny 7 mıllıard teńgeden asatyn iri jobalardy qarjylandyrýdy kózdeıdi.
Budan bólek, Prezıdentke tikeleı ınvestısııa tartý boıynsha birqatar bastama, sonyń ishinde sheteldik seriktestermen birlesken qorlar arqyly aýyl sharýashylyǵy, óńdeý jáne taý-ken metallýrgııasy salalarynda jobalar júzege asyrylatyny jóninde málimet berildi. Atalǵan qorlar «Astana» halyqaralyq qarjy ortalyǵynyń ıýrısdıksııasynda qurylady.
Memleket basshysy elimizdiń ornyqty ekonomıkalyq damýy úshin usynylyp otyrǵan bastamalardy oryndaýdyń mańyzyn atap ótti.
Qasym-Jomart Toqaev «Báıterek» holdıngine ekinshi deńgeıli banktermen birlesip, ekonomıkanyń naqty sektoryn qarjylandyrýdy, Energetıkalyq jáne kommýnaldyq sektorlardy jańǵyrtý ulttyq jobasyn iske asyrýǵa qarjy tartý máselesin sheshýdi tapsyrdy. Prezıdent alǵa qoıylǵan josparlardy tıimdi iske asyrý qajet ekenine basa nazar aýdardy.
