Bir ǵasyrlyq tarıhy bar qara shańyraq – elimizdegi tuńǵysh joǵary oqý orny retinde myńdaǵan bilikti ustazdardy daıyndap, qazaq eliniń aǵartý salasyna orasan úles qosyp keledi.
Ashyq esik kúniniń resmı bóliginde Akademııalyq máseleler jónindegi departament dırektory Haırýlla Janbekov sóz sóılep, túlekterge sáttilik tiledi. Sonymen qatar, bıylǵy Ulttyq biryńǵaı testileýden eń joǵary – 140 ball jınaǵan Almaty oblysy, Eńbekshiqazaq aýdany, "Tolqyn" orta mektebiniń túlegi Qýandyq Sanjar Ǵalymjanuly arnaıy marapattalyp, estelik syıǵa ıe boldy.
Shara aıasynda ýnıversıtettiń Sán jáne dızaın kafedrasynyń stýdentteri daıyndaǵan sán úlgileri kópshilik nazaryna usynyldy. Sondaı-aq, Almaty oblysy Bilim basqarmasynyń ókili Imanhatova Gýljıhan túlekterge quttyqtaý sóz arnady.
Ashyq esik kúni barysynda fakýltetter jármeńkesi ótkizilip, 15 jyldyq tájirıbesi bar pedagog-proforıentolog Omarbek Kóshkimbaıuly "Mamandyqty durys tańdaý men grantqa túsý joldary" taqyrybynda dáris oqydy.
Kásibı baǵdar berý jáne mansapty damytý departamentiniń dırektory Almas Ábdimanapuly Naımanbaev «Qazirgi tańda oqý ordamyzda toǵyz fakýltet bar. Olar Sorbonna-Qazaqstan ınstıtýty, Matematıka, fızıka jáne ınformatıka fakýlteti, Pedagogıka jáne psıhologııa fakýlteti, Jaratylystaný jáne geografııa fakýlteti, Fılologııa fakýlteti, Tarıh jáne quqyq fakýlteti, О́ner fakýlteti, Dene shynyqtyrý jáne alǵashqy áskerı daıyndyq fakýlteti jáne Astana bilim berý kafedrasy. Olardyń árqaısysy zamanaýı, sapaly maman daıyndaý úshin ýaqyt suranysyna saı beıimdelgen. Búgingi ashyq esik kúnine Almaty qalasy men Almaty jáne Jetisý oblystarynan jalpy sany 500-ge jýyq oqýshy kelip qatysty» - deıdi.
Shara konserttik baǵdarlamamen jáne vıktorınalyq suraqtarmen jalǵasty.
