Fotolar: T.Tanybaev.
Forýmǵa Qytaı, Qyrǵyzstan, О́zbekstan, Tájikstan, Túrikmenstan, Ázerbaıjan, Armenııa, Vetnam, Kýba, Mońǵolııa, Serbııa, Slovakııa jáne basqa da elderdiń Parlament delegasııalary qatysty.
Qorytyndy sessııa Reseı Federasııasynyń Prezıdenti Vladımır Pýtın men Belarýs Respýblıkasynyń Prezıdenti Aleksandr Lýkashenkonyń qatysýymen ótti.
Forýmnyń ashylýynda sóz sóılegen Erlan Qoshanov Ekinshi dúnıejúzilik soǵys adamzat shejiresindegi eń qaıǵyly oqıǵanyń biri retinde kópultty Qazaqstannyń ortaq tarıhynyń bir bóligi bolyp qalǵanyn atap ótti.
– Biz osynaý qasıetti jerde Uly Otan soǵysyndaǵy Jeńistiń 80 jyldyǵy qarsańynda jınalyp otyrmyz. Bul Jeńis – dúnıejúzilik mańyzy zor tarıhı oqıǵa. Soǵysty, qaharmandardy, olardyń erligin máńgi este saqtaý – bizdiń qasıetti boryshymyz. Osy oraıda Qazaqstan Respýblıkasynyń Prezıdenti Qasym-Jomart Toqaevtyń «Qazaqstan árqashan tarıhı shyndyqtyń jáne adamzat jylnamasyndaǵy eń qandy qasap týraly shynaıy kózqarastyń saqtalǵanyn qalaıdy» degen sózine nazar aýdarǵym keledi, – dedi Májilis spıkeri.
Ol sondaı-aq atalǵan mereıtoıǵa oraı Qazaqstan boıynsha eki myńǵa jýyq eske alý, ǵylymı-zertteý, aǵartýshylyq jáne basqa da is-sharalar ótkiziletinin aıtty. Astanadaǵy áskerı sherý eń aýqymdy oqıǵa bolmaq. Memleket basshysynyń bastamasymen elimizdiń túkpir-túkpirindegi eldi mekenderde bes júzden astam kóshege soǵysqa qatysqan jergilikti qaharmandardyń esimi beriledi.
Erlan Qoshanov soǵys jyldarynda Qazaqstanda barlyq maıdanda shaıqasqan ondaǵan áskerı bólim qurylǵanyn aıtty. Jalpy maıdanǵa Qazaqstannan 1,7 mıllıonnan astam adam attandy. Bul sol kezdegi respýblıka halqynyń tórtten bir bóligi bolatyn. Olardyń jartysynan astamy urys alańynan oralmady, 500-i Keńes Odaǵynyń Batyry ataǵyn aldy, 100-den astamy Dańq ordeniniń tolyq kavaleri boldy. Al tórteýi eki márte Keńes Odaǵynyń Batyry ataǵyn ıelendi.
Májilis spıkeri Stalıngrad maıdanynda – Ekinshi dúnıejúzilik soǵys tarıhyndaǵy eń iri ári qantógisti urystardyń birinde úsh júz myńnan astam Qazaqstannan attanǵan jaýynger erlikpen shaıqasqanyn eske saldy. Solardyń tórteýi – Nurken Ábdirov, Qarsybaı Sypataev, Tımofeı Pozolotın, Ǵaıaz Ramaev Keńes Odaǵynyń Batyry ataǵyna ıe bolǵan.
Sapar barysynda Májilis delegasııasy Mamaev qorǵanyndaǵy eske alý is-sharalaryna qatysty. Munda depýtattar Stalıngrad qorǵanysy kezinde erlikpen shaıqasqan Qazaqstan jaýyngerlerine arnalǵan eskertkishke jáne 1942 jyly jeltoqsanda 23 jasynda shaıqasta erlikpen qaza tapqan Keńes Odaǵynyń Batyry áskerı ushqysh Nurken Ábdirovtiń eskertkish taqtasyna gúl shoqtaryn qoıdy.
«Stalıngrad shaıqasy» mýzeı-panoramasyn aralaý kezinde Erlan Qoshanov Májilis atynan mýzeıge Nurken Ábdirovtiń týǵan jeri Qaraǵandyda ornatylǵan eskertkishiniń shaǵyn kóshirmesin syıǵa tartty.
Sondaı-aq Qazaqstan depýtattary forýmnyń paneldik sessııalaryna jáne Batyrlar alleıasyndaǵy Máńgilik alaý jaǵý rásimine qatysty.
