Foto: ashyq derekkózden
«Bıyl 21 sáýirde QHP fraksııasynyń bastamasymen uıymdastyrylǵan Úkimet saǵatynda osy taqyrypqa taǵy jan-jaqty toqtalyp, qoǵam men memlekettik organdardyń nazaryn aýdarttyq. Búginde máseleniń bar ekeni moıyndalǵanymen, Úkimet ony sheshýge qaýqarsyz. Buǵan deıin qabyldanǵan sharalar máseleni sheshýge de, tipti ony azaıtýǵa da áser etpedi», dedi M.Magerramov.
Májilismenniń sózinshe, QHP fraksııasy atalǵan máseleni sheshýdiń eń tıimdi ári jedel joly – Alımenttik qor qurý dep esepteıdi. Bul qor bıýdjetke aýyrtpalyq túsirmeıdi, sebebi onyń qarajaty salyqtyq emes túsimder esebinen toltyrylady. Sonymen qatar, alımenttik qor boryshkerlerdi masyldyqqa ıtermelemeıdi, óıtkeni qordan jumsalǵan qarajat keıinnen regrestik tártippen boryshkerden óndirip alynady.
«Biz Úkimettiń ózine bul suraqty qoıý kerek dep sanaımyz: ol boryshkerlerdiń masyl bolýynan qorqa ma, álde alıment almaı otyrǵan balalardyń muqtajdyǵynan ba? Ázirge Úkimet Alımenttik qor qurýǵa qarsy bolyp, boryshkerlerdiń jaǵdaıyn kóbirek oılap, balalardyń qajettilikterin eleýsiz qaldyryp otyr», dedi depýtat.
M.Magerramovtyń aıtýynsha Memleket jyl saıyn alımentke qatysty daýly ister boıynsha jeke sot oryndaýshylaryna (JSO) júzdegen mıllıon teńge tólep keledi.
«Biz bul qarajatty nátıjesizdikke emes, naqty nátıjege – balalardyń qajetine baǵyttaýdy usynamyz. Bıýdjet qarajatyn Alımenttik qor arqyly tikeleı balalardyń qajettilikterine jumsaý – áldeqaıda tıimdi tásil bolar edi», dedi májilismen.
Depýtattyń sózinshe alımentke muqtajdardyń arasynda múgedektigi bar balalar da az emes.
«Mundaı balalardy taǵdyrdyń tálkegine tastamaı, jalǵyz ózi baǵyp-qaǵyp otyrǵan ata-ananyń jumys isteýine de, tolyqqandy tabys tabýyna da densaýlyǵyna baılanysty shekteýler bar. Sonymen qatar, mundaı balalarǵa jıi medısınalyq tekserister, ońaltý sharalary men em-dom qajet bolǵandyqtan, shyǵyndary da kóp. Osy sanattaǵy ata-analar – eń aldymen memlekettik qoldaýǵa zárý. Eger ekinshi ata-anasy kómektespese, memleket qol ushyn sozýy tıis», dedi QHP depýtaty.
Osylardy aıta kele, «Qazaqstan halyq partııasy» depýtattary atynan kelesi talaptardy aıtty:
«Alımenttik qordyń pılottyq jobasyn ázirlep, ony jedel iske qosý. Bul joba – alıment óndirý týraly atqarýshylyq qujattary bar, biraq alıment almaıtyn múgedek balalardyń qajettiligin óteýge baǵyttalýy tıis.
Alımenttik qor qarajatynan jumsalǵan shyǵyndy óndirip alý mehanızmin aıyppuldar men ósimpuldardy eskere otyryp ázirleý», dep túıindedi depýtat Magerram Magerramov.
