Kórkemdik kompozısııa Keńes Odaǵynyń batyrlary - Málik Ǵabdýllın, Lesbek Joldasov, Qanash Qamzın, Qudaıbergen Suraǵanov, Rahymjan Toqataev, Ahmedııar Qusaıynov, Sádý Shákirov, Evgenıı Breýsov, Joldybaı Nurlybaev jáne soǵysqa attanǵan 114 QazPI (qazirgi - Abaı atyndaǵy QazUPÝ) stýdenti men oqytýshysynyń rýhyna degen taǵzym belgisi retinde ornatyldy.
Eskertkishtiń ashylýy – erliktiń máńgilik ekenin ulyqtap, batyrlardyń esimin jas urpaq jadyna sińirý maqsatynda uıymdastyryldy.
Is-sharaǵa ýnıversıtet rektory Bolat Tilep, Almaty qalasy Jastar saıasaty basqarmasy basshysynyń orynbasary Almaz Keńesbaı, ýnıversıtet basshylyǵy, oqytýshylar, ardager ustazdar, Keńes Odaǵynyń batyrlarynyń urpaqtary jáne bilim alýshy jastar qatysty.
«Búginge deıin ýnıversıtetten maıdanǵa attanǵan 8 Keńes Odaǵynyń batyry belgili bolsa, tarıhshy ǵalymdarymyzdyń muqııat zertteý jumystary nátıjesinde toǵyzynshy batyrdyń da osy oqý ordasynan shyqqany anyqtaldy. Osy oraıda túlekterdiń qoldaýymen belgi tas ornatylyp otyr. Bul – maıdanǵa attanǵan ustazdar men stýdentterdiń erligine degen taǵzym», – dedi saltanatty sózinde rektor Bolat Tilep.
Is-shara sońy «Erlikke taǵzym» atty konserttik baǵdarlamaǵa ulasty.
Aıta keteıik, eskertkish belgi Abaı ýnıversıtetiniń túlegi Raqymberdi Jetibaıdyń demeýshiligimen qoıylsa, sharany uıymdastyrýǵa ýnıversıtettiń Áleýmettik jáne jastar saıasaty jónindegi departamenti muryndyq boldy.
