Kórkemdik kompozısııa Keńes Odaǵynyń batyrlary – Málik Ǵabdýllın, Lesbek Joldasov, Qanash Qamzın, Qudaıbergen Suraǵanov, Rahymjan Toqataev, Ahmedııar Qusaıynov, Sádý Shákirov, Evgenıı Breýsov, Joldybaı Nurlybaev jáne maıdanǵa attanǵan 114 QazPI (qazirgi - Abaı atyndaǵy QazUPÝ) stýdentteri men oqytýshylaryna taǵzym retinde qoıyldy.
Eskertkishtiń ashylýy – Uly Otan soǵysynda erlik kórsetken batyrlarymyzdy ulyqtap, olardyń esimderin urpaq sanasynda máńgi este qaldyrý maqsatynda uıymdastyryldy.
Is-sharaǵa Abaı atyndaǵy QazUPÝ Basqarma tóraǵasy-rektor Bolat Tilep, Almaty qalasy Jastar saıasaty basqarmasy basshysynyń orynbasary Almaz Keńesbaı, prorektorlar, fakýltet dekandary, kafedra jáne bólim meńgerýshileri, professorlyq-oqytýshylar quramy, ardager ustazdar men Keńes Odaǵynyń batyrlary atanǵan ýnıversıtet túlekteriniń urpaqtary, sondaı-aq bilim alýshy jastar qatysty.
Abaı ýnıversıtetiniń Basqarma tóraǵasy-rektor Bolat Tilep quttyqtaý sózinde: «Osy kúnge deıin ýnıversıtetimizden maıdanǵa attanyp, Keńes Odaǵy batyry joǵary dárejesine ıe bolǵan 8 tulǵa belgili bolǵan bolsa, Jeńistiń 80 jyldyǵy qarsańynda bizdiń tarıhshy ǵalymdarymyzdyń zerttep-zerdeleýimen, arhıvtik qujattardy qaıta qarap, jumystanýynyń nátıjesinde toǵyzynshy batyrdyń da osy ýnıversıtetten shyqqany anyqtalyp otyr. Osy oraıda ýnıversıtet túlekteriniń qoldaýymen arnaıy belgi tas ornatylyp jatyr. Bul belgi – ýnıversıtetimizden maıdanǵa attanǵan oqytýshylar, ǵalymdar men stýdentterdiń erligine, babalar rýhyna taǵzym retinde qoıyldy», - dep atap ótti.
Resmı is-shara sońy «Erlikke taǵzym» atty konserttik baǵdarlamamen jalǵasty.
Aıta keteıik, «Erlikke taǵzym» eskertkish tas belgisi Abaı atyndaǵy QazUPÝ-dyń túlegi Raqymberdi Jetibaıdyń demeýshiligimen ornatyldy. Al atalǵan sharanyń uıymdastyrylýyna ýnıversıtettiń Áleýmettik jáne jastar saıasaty jónindegi departamenti muryndyq boldy.
