Foto: Qorǵanys mınıstrligi
Konsert barysynda Qazaqstannyń tanymal mádenıet qaıratkerleri men jetekshi ártisteri, orkestrlik, hor jáne bı ujymdary kórermenderge patrıottyq rýh syılady. Olar áskerı qyzmetshilerge, Qarýly kúshterdiń ardagerlerine, áskerı kolledj kýrsanttary men «Jas sarbaz» áskerı-patrıottyq qozǵalysynyń tárbıelenýshilerine arnap soǵys jyldaryndaǵy jáne qazirgi patrıottyq ánderdi oryndady.
Sahna tórinde Estradalyq-sımfonııalyq orkestr men folklorlyq-etnografııalyq ansambl Nurǵısa Tilendıevtiń «Ata tolǵaýy» atty tereń maǵynaly kúıin oryndap, uly kompozıtordyń dúnıetanymyn áserli jetkize bildi. Sondaı-aq jońǵar shapqynshylyǵy kezindegi qazaq halqynyń azapty kezeńin sýretteıtin tarıhı-mýzykalyq «Elim-aı» týyndysy shyrqaldy.
Konserttiń mazmunyn tereńdete túsken erekshe qoıylym – «Soǵys hattary» mızanssenasy boldy. Onda Álııa esimdi keıipker Keńes Odaǵynyń Batyry Álııa Moldaǵulovaǵa arnap úndeý joldady. Kórinis patrıottyq sezimdi qozǵaǵan «Álııa» ánimen túıindeldi.
Soǵys jyldarynan beri halyq jadynda saqtalǵan «Jas qazaq», «Jýravlı», «Talıanochka», «Trı tankısta», «Iаblochko», «Eh, dorogı», «Sınıı platochek», «Katıýsha», «Ehal ıa ız Berlına» jáne «Maıskıı vals» sekildi ánder oryndalyp, kórermender tarapynan jyly qabyldandy.
Sonymen qatar, solıster men vokaldyq toptar, hor ujymdary oryndaǵan «Qarýly kúshter», «Ǵasyrlar úni», «Umytpaımyz», «Men qazaq», «Qazaqstan – baıtaq dala», «Saýyt» jáne «Atameken» ánderi kórermenderge el men jerge degen súıispenshilik sezimin uıalatty.
Kesh sońynda Qurmanǵazy atyndaǵy Qazaq ulttyq konservatorııasy men K. Baıseıitova atyndaǵy Qazaq ulttyq óner ýnıversıtetiniń dombyrashylary men solısteri «Jeńis kúni» jáne «Atameken» ánderin oryndap, patrıottyq konsertti joǵary notamen qorytyndylady.
