Fotokollaj: Azattyq Rýhy
Buǵan qosa, zańsyz sý paıdalaný derekterine sáıkes 6,4 mıllıon teńgeniń 35 ákimshilik aıyppuly salynǵan. Bul kórsetkishtiń ishinde jospardan tys júrgizilgen tekserýler negizinde 1,4 mln teńgege 12 aıyppul, al quqyq qorǵaý jáne memlekettik organdardyń joldaǵan materıaldary boıynsha 5 mln teńgege 23 aıyppul qarastyrylǵan.
Sý resýrstary jáne ırrıgasııa mınıstrligine qarasty basseındik ınspeksııalar jyl basynan beri 13 tekserý júrgizip, 8 zańbuzýshylyqty tirkedi. Anyqtalǵan kemshilikterdi joıý úshin 7 uıǵarym berilgen. Bul jumystar sý paıdalanýdaǵy tártipti arttyrýǵa baǵyttalǵan baqylaý sharalarynyń jalǵasyp jatqanyn ańǵartady.
Salystyrmaly túrde alǵanda, 2024 jyly sý zańnamasynyń talaptaryn saqtamaǵandardan 556 ákimshilik quqyq buzýshylyq boıynsha 44,5 mıllıon teńge óndirilgen bolatyn. Sol kezeńde 439 tekserý júrgizilip, 1855 quqyq buzýshylyq anyqtalǵan.
2023 jyly Sý resýrstaryn retteý, qorǵaý jáne paıdalaný komıteti qurylǵannan keıin bul baǵyttaǵy jumys júıelene tústi. Sý ınspektorlarynyń sany 98 adamnan 210-ǵa deıin kóbeıtilip, kadrlyq áleýet arttyryldy. Sonymen qatar jańa Sý kodeksi qabyldanyp, basseındik ınspeksııalarǵa baqylaý júrgizý quzyreti berildi. Endi olar quqyq buzýshylyq anyqtalǵan jaǵdaıda jedel áreket etýge múmkindik aldy.
Sý resýrstary jáne ırrıgasııa vıse-mınıstri Nurlan Aldamjarovtyń aıtýynsha, Ákimshilik quqyq buzýshylyqtar týraly kodekske engizilgen túzetýler arqyly sý salasyndaǵy zań buzýshylyqtar úshin jaýapkershilik te kúsheıtilgen.
Sý resýrstary – tabıǵı ári strategııalyq mańyzy bar qor. Ony utymdy ári zańdy paıdalaný, eń aldymen, ekologııalyq turaqtylyq pen salalyq tártiptiń saqtalýyna yqpal etedi. Jasalǵan sharalar osy baǵyttaǵy jumysty jandandyrýǵa jáne kóleńkeli tutyný faktilerin azaıtýǵa negiz bolyp otyr.
