Jurtshylyqtyń kóz aldynda 500-den astam dron kókke kóterilip, jaryq pen anımasııa arqyly erlik pen janqııarlyqty, este qalǵan erlikke toly sátterdi baıandady. Sondaı-aq, «Almaty» telearnasynyń YouTube-arnasynda tikeleı efır uıymdastyryldy.
Shoýdyń ashylý sátinde «80 • 1941–1945» degen jazýy bar juldyz paıda boldy – bul erliktiń sımvoly ári uly jeńis jyldaryn eske salatyn belgi. Odan keıin aspanda jaýynger kaskasy men qyzyl qalampyrlar beınelenip, soǵysta qaza tapqandarǵa qurmet kórsetildi. Eń áserli kórinistiń biri – soǵystan oralmaǵan sarbazdardyń rýhyn beıneleıtin ushyp bara jatqan tyrnalar kompozısııasy boldy.
Shoýdyń mańyzdy bóligi qazaqstandyq qaharmandarǵa arnaldy. Aty ańyzǵa aınalǵan Mánshúk Mámetova men Álııa Moldaǵulovanyń kezegi kelgende, Mánshúk – pýlemetpen, Álııa – myltyqpen shyqty. Sondaı-aq, jaýyngerlik ushaqpen turǵan áıgili ushqysh Talǵat Bıgeldınovtyń beınesi de kórermendi áserge bóledi. Halyq qaharmany, qolbasshy ári jazýshy Baýyrjan Momyshulynyń tulǵasy batyrlyq pen qaısarlyqtyń sımvoly retinde jaryqqa shyqty.
Budan ózge kórinisterde Jeńis týynyń kóterilý sáti, juldyz pishinindegi Máńgilik alaý men «Eshkim de, eshqashan da umytylmaıdy!» degen jazý beınelendi. Shoýdyń aqtyq sátinde qazaqy oıýmen kómkerilgen kompozısııa men jarqyraǵan «Jeńis kúni qutty bolsyn!» degen jazý kórermenderdi erekshe áserge bóledi.
- Bul jaryq shoý – eske alý sharasy ǵana emes, tarıhı murany jańa býynǵa jetkizýdiń jańa tásili. Ol tarıhty umytpaı, oǵan maqtanyshpen qaraý kerektigin eske saldy, - deıdi uıymdastyrýshylar.
Kórermenderge Abaı alańynda, «Qazaqstan» qonaqúıi janynda, Caspian University mańynda jáne Abaı dańǵyly boıynda arnaýly alańdar daıarlandy. Shoý kezinde qala ortalyǵyndaǵy kólik qozǵalysy ýaqytsha shekteldi.
Almatydaǵy drondar shoýy Jeńis kúnin atap ótýdiń jarqyn ári este qalarlyq sátine aınaldy. Shoýdyń áserin kúsheıtken áskerı jyldardaǵy ánder men patrıottyq áýender ár kórinistiń emosııalyq qýatyn arttyryp, kórermenderdiń kókeıine maqtanysh sezimin uıalatty.
