Marafonnyń ara qashyqtyǵy 125 shaqyrym joldy qurady. Velosıped tizgindegen áýesqoı sportshylardy jol polısııasy bastap júrdi. Sonymen birge jedel járdem qyzmeti sportshylardyń densaýlyǵyn baqylap turdy.
Velomarafon megapolıske arnaıy is-saparmen kelgen «Atameken» ulttyq kásipkerler palatasynyń tóralqa tóraǵasy, Qazaqstan velosport federasııasynyń prezıdenti Raıymbek Batalovtyń qatysýymen ashyldy. Elimizdiń velosport jetekshisi kelesi jyldan bastap bul marafon halyqaralyq deńgeıde ótetinin málimdedi.
«Shymkent-Tashkent velomarafony megapolıstiń jyl saıyn ótetin dástúrli sporttyq jarysqa aınaldy. Atalǵan sporttyq is-sharany uıymdastyrýǵa qoldaý kórsetken qalalyq ákimdikke, shahardyń velosport federasııasyna jáne demeýshilerge aıtar alǵysym sheksiz. Velojarys tek sport emes, sporttyq mádenıet. Salamatty ómir salty. Biz osy sport túrin órkendetip, nasıhattaý arqyly halyqtyń densaýlyǵyn kúsheıtemiz, jastardyń velosportqa qyzyǵýshylyǵyn arttyramyz. Al búgingi jarystan túsken qarajattyń bir bóligi qaıyrymdylyq retinde balalar úıine aýdarylady. Velobáıgeni uıymdastyrýǵa atsalysqan barsha azamatqa federasııa atynan taǵy da rahmet aıtamyn» dedi R.Batalov.
Jarystyń ashylý rásiminde sóz alǵan qala ákiminiń orynbasary Sársen Quranbek te búgingi tańda memleket tarapynan sportty damytýǵa barynsha qoldaý kórsetilip jatqanyn málimdedi. Sonyń nátıjesinde halyqaralyq deńgeıdegi túrli jarystarda shymkenttik órender júldeli oryndardan kórinip júr. Olımpıada oıyndaryna qatysatyn ulttyq qurama sapynda da megapolıs sportshylary jeterlik. Sonymen birge Shymqalanyń ózinde ártúrli dárejedegi sporttyq báıgeler uıymdastyrylyp turady. Al memlekettik qoldaýdyń nátıjesinde osy kúnde shaharda kóptegen sporttyq úıirmeler ashylǵan. Onda júzdegen bala sabaqtan tys ýaqytta sportpen shuǵyldanyp, bolashaq chempıon bolýǵa umtylyp baǵýda. Munyń bári megapolıstiń sporttyq áleýetiniń joǵary ekenin baıqatady jáne salamatty Qazaqstannyń qalyptasýyna zor úles qosyp jatyr degen oı aıtty qala ákiminiń orynbasary S.Quranbek.
Arnaıy is-sapar barysynda «Atameken» ulttyq kásipkerler palatasynyń tóralqa tóraǵasy, Qazaqstan velosport federasııasynyń prezıdenti Raıymbek Batalov Qazaqstannyń jeńil atletıka federasııasynyń vıse-prezıdenti Olga Rypakovamen birge qala ákimi Ǵabıt Syzdyqbekovpen kezdesip, megapolıste velosport pen jeńil atletıka sportyn damytý jaıynda másele qozǵady. Sondaı-aq álemdik «Gran Fondo» shosselik velosaıysyn Shymkent qalasynda ótkizý múmkindigin saralady. О́ıtkeni bul jarysqa shahardyń ınfraqurylymy tolyq sáıkes keledi. Jalpy Shymkent halyqaralyq saıystardy uıymdastyrýǵa tájirıbesi bar qala. Sonyń bir aıǵaǵy byltyr ótken álemdik shahmat saıysy. Elimizdiń shahmat federasııasy bul dodany ótkizýge arnaıy úshinshi megapolısti tańdaǵan. Sol sekildi halyqaralyq marafon men velojarystardy Shymkentte uıymdastyrýǵa tolyq múmkindik bar. Qala ákimdigi tarapynan qonaqtarmen bolǵan kezdesýde osyndaı oı aıtyldy.
Shymkent
