Foto: egemen.kz/ Erlan Omar
«Keleshek» jańa jınaqtaý júıesiniń qatysýshysy bolý úshin Otbasy bankinen «AQYL» bilim berý jınaqtaý salymyn ashý qajet.
Jetim balalar men ata-anasynyń qamqorlyǵynsyz qalǵan balalar úshin bastapqy bilim berý kapıtaly 2025 jyly 471 840 teńge bolyp bekitilgen. Budan basqa sanattar úshin memleket ashylǵan ár shotqa 235 920 teńge aýdarady.
Memleketten 235 920 teńge kólemindegi bastapqy kapıtaldy alý qadamdary qandaı?
«AQYL» depozıtin mynadaı jolmen ashýǵa bolady:
- Baspana market portalynda. Ol úshin otbasybank.kz saıtyndaǵy jeke kabınetińizge kirińiz, «Meniń bankim» ashyp, «Depozıtterge» ótý kerek. Ári qaraı, «Jańa depozıt» batyrmasyn basyp, «AQYL» depozıtin ashasyz;
- Otbasy banktiń «Otbasy bank» mobıldi qosymshasynda da shot ashýǵa bolady. Ol úshin mobıldi qosymshada «Meniń bankim» batyrmasyn basyp, «Jańa depozıtti ashý» kezeńine ótip, «AQYL» depozıtin tańdaý kerek;
- Bank bólimshelerinde de shot ashý úshin alǵashqy qadamdy jasaı alasyz.
- Keńesshilerdiń kómegimen. Silteme arqyly óz qalańyzdan keńesshi tańdaısyz: https://hcsbk.kz/network-agents/.
Otbasy bankinde «AQYL» depozıtteri ashylǵan adamdar ne isteýi kerek?
2025 jyldyń birinshi jartyjyldyǵynda 5 jasqa tolatyn balalardyń ata-analaryna 2025 jyldyń 15 mamyrynan 30 maýsymyna deıin Baspana market portalyndaǵy (otbasybank.kz) nemese Otbasy bank mobıldi qosymshasyndaǵy Jeke kabınette «AQYL» depozıtine qosymsha kelisimge qol qoıýy qajet. Bul jaǵdaıda bastapqy bilim berý kapıtaly qoldanystaǵy depozıtke esepteledi. Aqsha 2025 jyldyń 31 tamyzyna deıin túsedi.
1 shilde men 31 jeltoqsan aralyǵynda 5 jasqa tolatyn balalar da bıylǵy jyly qosymsha kelisimge qol qoıýy kerek. Bul kezeń úshin qarajat 2026 jyldyń 28 aqpanyna deıin túsýi tıis.
«Keleshek» baǵdarlamasynan tys «AQYL» depozıtin kez kelgen jasta ashýǵa bolady. Ony neǵurlym tezirek ashý arqyly, bolashaq bilim alýǵa soǵurlym yńǵaıly jáne tıimdi qarajat jınaý múmkindigi bar. 2025 jyldan bastap «AQYL» bilim berý jınaqtaý salymyn avtomatty túrde uzartýmen keminde 1 jyl merzimge ashýǵa bolady. Zań depozıttiń jyldyq tıimdi mólsherlemesin retteıdi. Endi bul Ulttyq Banktiń bazalyq mólsherlemesine baılanysty. Mysaly, qazirgi ýaqytta QR UB bazalyq mólsherlemesiniń deńgeıi 16,5% quraıdy, demek, salym merzimi 1 jyl bolǵanda depozıt boıynsha JTSM 14,5%-dan tómen bolmaıdy. Depozıt jańa merzimge uzartylǵan kezde, JTSM qoldanystaǵy bazalyq mólsherlemege sáıkes avtomatty túrde ózgeredi. Banktiń eseptelgen syıaqysy aı saıyn kapıtaldandyrylady. Bul oǵan da banktiń syıaqysy esepteletinin bildiredi. Sonymen qatar, memleket jyl saıyn «AQYL» depozıtterine syılyqaqy esepteıdi. Salymshylardyń barlyq sanattary úshin ol 5% teń. Jetim balalarǵa, ata-anasynyń qamqorlyǵynsyz qalǵan balalarǵa, múmkindigi shekteýli balalarǵa, kóp balaly otbasylardan shyqqan jáne az qamtylǵan otbasylardan shyqqan balalarǵa ashylǵan depozıtterge 7% mólsherinde memlekettik syılyqaqy esepteletin bolady», delingen «Otbasy bank» joldaǵan jaýapta.
«AQYL» depozıti aıasynda jyl saıyn depozıtke esepteletin syılyqaqynyń eń joǵary mólsheri 2025 jyly - 393 200 teńge. Memlekettik syılyqaqyny jınaqtaýdyń eń az merzimi 1 jyl bolǵanda esepteledi, ıaǵnı ony alý úshin salym bir jylǵa tolýy tıis. Eger bul depozıtti 2025 jyldyń aqpanynda ashqan bolsańyz, onda memlekettik syılyqaqy 2027 jyly esepteledi, óıtkeni 2026 jyldyń 1 qańtarynda depozıttiń ashylǵanyna nebári 11 aı bolady.
Depozıtti ashý úshin jınaqtaýshy mindetti bastapqy jarnany, ıaǵnı, 11 796 teńge salýy tıis (2024 jyly). Jetim balalardan bastapqy jarna somasyn salý talap etilmeıdi.
«AQYL» depozıtin jınaqtaýshy ata-ana úshin mańyzdy jadnama
«AQYL» depozıtin jınaqtaýda ata-ana eskerer mańyzdy másele bar. Ol jyl boıyna salymshy eń tómengi 94 368 teńgeni jınaqtamasa shot ashylǵanda berilgen memlekettik kapıtal bıýdjetke qaıtarylady. Halyqtyń áleýmettik osal toptary sanatyndaǵy balalar úshin bıyl eń tómengi 47 184 teńgeni jınanaqtasa jetkilikti. Salymshylar bul somany jyl sońyna deıin bólshektep nemese jylyna bir ret qosyp salýyna bolady. Al jetim balalar men ata-anasynyń qamqorlyǵynsyz qalǵan balalar ashylǵan «AQYL» depozıtine jyl saıyn mindetti jarnalar salýǵa mindettelmeıdi.
Al «AQYL» depozıtine jyldar boıy qarjy jınaǵan bala grant ıegeri atansa ne bolmaq degen saýalǵa qaıta oralsaq. Onda bala dıplom alǵannan keıin depozıtte jınaqtalǵan qarajatty banktiń kapıtaldandyrylǵan syıaqysyn, memlekettik syılyqaqy men bastapqy bilim berý kapıtalyn aǵa-baýyrlarǵa, apa-sińlilerge, týystarǵa, dostarǵa berýine bolady. Sondaı-aq, magıstratýra ne doktaranýra bilimi úshin qoldanýǵa ruqsat beriledi. Bastysy jınaqtalǵan qarjyny turǵyn úı jaǵdaılaryn jaqsartý úshin paıdalanýǵa bolady.
