M.Áshimbaev atap ótkendeı, elimiz úshin ǵarysh salasyn damytý memlekettiń egemendigi men qaýipsizdigin qamtamasyz etý jolyndaǵy strategııalyq mańyzǵa ıe. Sondyqtan Memleket basshysy bul baǵytqa únemi basa mán berip keledi.
Senat tóraǵasy ǵarysh salasyndaǵy jumysty jetildirý úshin kadr tapshylyǵyn sheshýge, bilim berý sapasyn arttyrýǵa, ulttyq spýtnıktik baǵdarlamany damytýǵa, jobalardy kommersııalandyrýǵa jáne basqa da mańyzdy máselelerge erekshe nazar aýdarý qajet ekenin atap ótti.
О́z kezeginde, Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev senatorlarǵa atalǵan salany ilgeriletý maqsatymen qolǵa alynǵan jumystar jóninde aıtyp berdi. Sıfrlyq damý, ınnovasııalar jáne aeroǵarysh ónerkásibi vıse-mınıstri Málik Oljabekov Ulttyq ǵarysh ortalyǵynyń aldaǵy kezeńge arnalǵan josparlary men jobalaryna toqtaldy.
Is-sharada SDIAО́M Aeroǵarysh komıtetiniń tóraǵasy Baýbek Oralmaǵambetov «Baıqońyr» ǵarysh aılaǵynyń ushyrý qyzmetteri men damý keleshegi týraly baıandady. Sondaı-aq kezdesý barysynda Jerdi qashyqtyqtan zondtaýdyń jáne spýtnıktik baılanys pen habar taratýdyń ǵaryshtyq júıesine qatysty máseleler sóz boldy.
Sonymen qatar depýtattar spýtnıkti synaýǵa arnalǵan akýstıkalyq kamera, elektromagnıttik úılesimdilik kamerasy, shaǵyn jáne úlken termovakýýmdyq kamera sııaqty ǵarysh apparattaryn shyǵaratyn Qurastyrý-synaý kesheniniń ýchaskelerine bardy jáne Jerdi qashyqtyqtan zondtaýdyń spýtnıktik toptamasy óndirisiniń tanystyrylymyna qatysty.
