Mınıstrdiń aıtýynsha, Otbasy kúni – otyz jyldan astam ýaqyt boıy otbasy uǵymynyń qasterliligin eske salyp, onyń qoǵamdaǵy rólin dáriptep kele jatqan erekshe meıram. Birikken Ulttar Uıymynyń bastamasymen bekitilgen bul kún meıirim, mahabbat, qamqorlyq syndy adamı qundylyqtardy ulyqtaýǵa múmkindik beredi.
Búginde elimizde 6,2 mıllıonnan astam otbasy bar. Aıda Balaeva otbasy ınstıtýtyn qoldaý – Qazaqstan úshin tek basym baǵyt emes, sonymen qatar eldiń turaqty damýynyń berik negizi ekenin atap ótti. Ana men balany qorǵaý máselesine aıryqsha mán berilip, otbasynyń qaýipsiz ári jaıly ómir súrýi úshin barlyq jaǵdaı jasalyp otyr.
Mınıstr, ásirese, jas otbasylarǵa erekshe qoldaý kórsetýdiń mańyzdylyǵyna toqtaldy. Áıelder men balalardyń quqyǵyn qorǵaýǵa arnalǵan zańnamalar turaqty túrde jetildirilip, áleýmettik járdemaqylar men bala kútimine arnalǵan tólemder arqyly naqty qoldaý kórsetilýde. Qazirgi ýaqytta elimizde 112 Otbasy qoldaý ortalyǵy jumys istep tur. Bul ortalyqtar azamattarǵa psıhologııalyq, quqyqtyq jáne áleýmettik kómek kórsetip, ómirlik mańyzdy máselelerdi sheshýge kómektesýde.
«Otbasy – bul tek qoǵamnyń bir bólshegi emes. Bul – tulǵanyń tárbıesi men qundylyqtarynyń qalyptasatyn aıaýly mekeni. Otbasy berik bolsa – memleket te myqty bolady», dedi Aıda Balaeva.
Mınıstr sondaı-aq urpaǵyna ulttyq tárbıe men otbasy qundylyqtaryn darytyp otyrǵan ata-analarǵa shynaıy alǵysyn bildirip, ár shańyraqqa amandyq, molshylyq pen birlik tiledi.
Aıta keteıik, dál osy kúni «Mereıli otbasy» ulttyq baıqaýyna ótinim qabyldaý bastaldy. Aıda Balaeva barlyq óńir turǵyndaryn baıqaýǵa belsendi qatysýǵa shaqyrdy.
«Bizdiń elimizde ónegeli ómir saltyn ustanyp, óz taǵylymy arqyly ózgelerge úlgi bola alatyn otbasylar jeterlik. Mundaı otbasylardyń tájirıbesi kópshilikke shabyt syılaıdy», dedi mınıstr.
Sonymen qatar, Otbasy kúnine arnalǵan onlaın-chellendj de bastaý aldy. Mınıstr qazaqstandyqtardy #otbasykúni2025 jáne #densemı2025 heshtegterimen júrekke jyly estelikter, fotolar men otbasylyq dástúrlermen bólisýge shaqyrdy.
