Poıyz túngi ýaqytta kelgenine qaramastan, perrondaǵy kútýshilerdiń júzderinen merekelik shattyq lebi esip turdy. Paradta sherý tartqan arýlardy garnızon basshylyǵy, týǵan-týystary men áriptesteri dál qarsy aldarynan kútip alyp erekshe qurmetke bóledi. Aldymen poıyzdan túsken boıda qyzdarǵa gúl shoqtary tabys etildi. О́z áskerı bólimderi atynan memlekettik mańyzdy is-sharada abyroımen óner kórsetkenderi úshin olarǵa shynaıy alǵys sózder men tilekter jaýdyryldy.
Garnızon bastyǵynyń orynbasary, podpolkovnık Qýanysh Aıdynǵalıev quttyqtaý sóz sóılep, paradqa qatysýshylardyń áskerı ujymdaryndaǵy abyroıy erekshe ekenine toqtaldy.
«Bul paradtyń aýqymy men mańyzdylyǵyn túsiný úshin mynany aıtqym keledi: mundaı joǵary deńgeıli saltanatty sherý elimizde sońǵy segiz jylda alǵash ret ótkizildi. Ol halqymyzdyń Ekinshi dúnıejúzilik soǵystaǵy erliginiń qaıtalanbas beınesi ári qazirgi býyn jaýyngerlerine mura bolyp kele jatqan áskerı dástúrdiń tamasha sabaqtastyǵy. Osy paradqa qatysqan barsha sarbazdarǵa alǵysym sheksiz. Sizderge myqty densaýlyq, otbasylyq baqyt jáne aspanymyz árdaıym ashyq bolsyn dep tileımiz!» dedi ol.
Áskerı mamandardyń aıtýynsha jalpy paradqa daıyndyq 45 kúnge sozylǵan. Osy ýaqyt ishinde áskerı qyzmetshiler elordada arnaıy issaparda bolyp, kún saıyn birtutas saptyq qurammen jattyǵý ótkizdi. Bul sherý olardyń shydamdylyǵy men denesiniń fızıkalyq daıyndyǵyn shamalady, sonymen birge saptyq mashyǵyn jańa deńgeıge kóterdi. Eń bastysy barlyq qatysýshy áıelder qoıylǵan maqsat-mindetterdi abyroımen oryndap shyqqanyn aıtty áskerıler.
Al qyzdardyń úlken is tyndyryp qaıtýy olardyń jaqyndary men áriptesteri úshin shyn máninde naǵyz qýanyshqa aınaldy. Ol kelýshilerdi qarsy alyp jatqandardyń bal bul jaınaǵan júzinen, emosııasynan anyq baıqaldy. Uzaq sapardan keıin bári bir-birin saǵynysyp qalǵany qushaǵyna qysqan sálemdesýlerinen, arqa-jarqa kóńilderinen, qýanyshtan tógilgen kóz jastarynan anyq ańǵarylyp turdy.
Shymkent
