Konferensııada sý tapshylyǵy, transshekaralyq sý resýrstaryn tıimdi basqarý, jáne óńirlik yntymaqtastyqty nyǵaıtý máseleleri talqylandy. Jıynnyń ashylý saltanatynda «Baıtaq» partııasynyń tóraǵasy Azamathan Ámirtaev sóz sóıledi.
«BAQ betterinde bolashaqta sý qaqtyǵystary eń ótkir máselege aınalady degen boljam aıtylyp júr. Osy sebepti búginnen bastap kelissózder júrgizý qajet. Sý tapshylyǵynyń aldyn alý úshin kórshi eldermen tıimdi yntymaqtastyq ornatyp, resýrsty únemdep paıdalanýymyz kerek. Sonda bul sý júz jylǵa deıin jetýi múmkin», dedi ol.
Atalǵan konferensııa 2026 jyly Prezıdent Qasym-Jomart Toqaevtyń bastamasymen ótetin Ortalyq Azııa elderiniń О́ńirlik klımattyq sammıtine mańyzdy saıası jáne mazmundyq negiz bolady. Is-sharada Aýǵanstanda salynyp jatqan Kosh-Tepe kanalyna erekshe nazar aýdaryldy. Bul jobanyń iske asýy Ámýdarııa ózeniniń tómengi aǵysyndaǵy О́zbekstan men Túrikmenstanǵa áser etýi múmkin. Al bul óz kezeginde Qazaqstannyń da sý resýrstaryna qysym túsirýi yqtımal.
«Ámýdarııa sýynyń 25–30%-y Kosh-Tepe kanalyna tartylýy múmkin. Bul О́zbekstan men Túrikmenstannyń sý kóleminiń azaıýyna alyp keledi. Al О́zbekstan Syrdarııadan kóbirek sý ala bastaıdy. Sonyń saldarynan Qazaqstanǵa keletin sý kólemi 30–40%-ǵa azaıýy yqtımal. Biz bireýdi synaý úshin emes, túsinistik ornatý úshin jınaldyq. Aýǵanstanǵa zamanaýı tehnologııa arqyly kómektesý – bárimiz úshin tıimdi sheshim bolýy múmkin», dedi Azamathan Ámirtaev.
Konferensııa barysynda «Baıtaq» partııasy sý qaýipsizdigine qatysty óńirlik kelisimder men ǵylymı-tehnıkalyq yntymaqtastyqty damytý jóninde usynys jasady. Green Finance Centre ókilderi transshekaralyq sý jobalaryn qarjylandyrý joldaryn talqylady. Basqosýǵa Qazaqstandaǵy Túrkııa, Izraıl, Qyrǵyz Respýblıkasy, Vengrııa, Tájikstan, AQSh, Aýǵanstan, Koreıa Respýblıkasy, Túrikmenstan jáne ózge de elderdiń elshileri men elshilikteriniń ókilderi qatysty. Jıynǵa sondaı-aq salalyq mınıstrlikterdiń ókilderi, oblystar men respýblıkalyq mańyzy bar qalalar ákimdikteriniń tabıǵı resýrstar jáne tabıǵat paıdalanýdy retteý basqarmalarynyń basshylary, ǵylymı-zertteý ınstıtýttary, Halyqaralyq Araldy Qutqarý Qory, BUU Qorshaǵan orta baǵdarlamasy, Qazaq tehnologııa jáne bıznes ýnıversıteti, túrli qaýymdastyqtar, otandyq jáne halyqaralyq ǵalymdar, sarapshylar men gıdrologııa, ekologııa jáne sý quqyǵy salasynyń jetekshi mamandary qatysty.
Konferensııa sońynda qatysýshylar sý qaýipsizdigi salasyndaǵy óńirlik kelisimderdi nyǵaıtý, ǵylymı zertteýler júrgizý, ınnovasııalyq tehnologııalardy engizý jáne sý resýrstaryn tıimdi basqarý salalarynda birlesip jumys isteýge ýaǵdalasty. Is-shara aımaqtyń sý máselelerin talqylaý úshin mańyzdy halyqaralyq alań boldy.
