Bul marapattardy vedomstvo basshysy Ǵanı Beısembaev tabystap, aýyl balalarynyń sporttaǵy jetistikterine shynaıy qurmet kórsetti. Mınıstrdiń aıtýynsha, bul – aýyl jastarynyń qajyrly eńbegine berilgen ádil baǵa.
Saltanatty sátte jasóspirimderdiń qýanyshy kózderinen baıqaldy. Serbııada ótken GYMNASIADE U15 halyqaralyq jarysynyń jeńimpazy Nurtas Álimbaı alǵan áserin bólisti.
«AUYLSPORT jobasy arqyly buryn tek arman bolyp kóringen dúnıeler shyndyqqa aınaldy. Mınıstrdiń qolynan marapat alý – men úshin qol jetpeıtindeı bıik edi. Búgin sol arman oryndaldy. Bul – men sekildi myńdaǵan aýyl balasynyń úmitine jol ashqan joba», dedi jas sportshy.
2024 jyly iske qosylǵan AUYLSPORT jobasy qysqa ýaqyt ishinde elimizdiń barlyq óńirinen keń qoldaý tapty. Búginde 10 myńnan astam bala osy bastama aıasynda júıeli túrde sportpen aınalysyp júr. Serbııada ótken Gımnazıadada Qazaqstan quramasy sapynda synǵa túsken 22 sportshynyń 12-si – osy bastamanyń jemisi bolyp otyr.
«Mınıstrlik tarapynan berilgen bul marapat – AUYLSPORT jobasynyń jańa deńgeıge kóterilgeniniń aıǵaǵy. Bul – aýyldaǵy daryndy jasóspirimderdiń bolashaǵyna senim artýdyń kórinisi. Bul qurmet – bolashaq jeńisterge bastaıtyn berik negiz», dedi Halyk qorynyń atqarýshy dırektory Ǵalymbek Jaqsylyqov.
AUYLSPORT – aýyl jastaryna arnalǵan sport seksııasy ǵana emes, olardyń ómirin ózgertetin jańa baǵdar. Joba belgili mesenat Tımýr Qulybaevtyń bastamasymen qolǵa alynǵan. Alǵashqy kezeńde 200 aýyldan 12 myńnan astam bala qatysqan. Halyk qory aýyl sportynyń damýyna 500 mıllıon teńgege jýyq qarjy baǵyttaǵan.
