Máýlen Áshimbaev máslıhat depýtattarymen jáne jurtshylyqpen kezdesýde óńirlerdi nátıjeli damytyp, azamattardyń ál-aýqatyn arttyrý úshin el Prezıdentiniń bastamasymen qolǵa alynǵan reformalardy sapaly iske asyrýdyń mańyzdy ekenin aıtty. Osyǵan baılanysty ol zańnamalyq sala boıynsha aldaǵy birlesken jumystyń negizgi baǵyttaryna toqtaldy.
«Prezıdent Qasym-Jomart Toqaevtyń bastamasymen elimizde keshendi reformalar iske asyrylyp jatyr. Sonyń ishinde ekonomıkany ártaraptandyrýǵa, óńdeý ónerkásibi men aýyl sharýashylyǵyn damytýǵa kóńil bólinip jatyr. Ulttyq quryltaıdyń IV otyrysynda elimizdiń áleýmettik-ekonomıkalyq jáne saıası baǵdaryna qatysty basymdyqtar aıqyndaldy. Munyń bári – Ádiletti, Qaýipsiz, Taza, Qýatty Qazaqstan qurý úshin qolǵa alynǵan keshendi bastamalar. Memleket basshysy belgilep bergen osy mindetterdi iske asyrý jolynda senatorlar men máslıhat depýtattarynyń júıeli ózara is-qımyly men birlesken jumysyn ári qaraı jalǵastyrýdyń mańyzy zor», dedi Senat tóraǵasy.
Sonymen qatar palata spıkeri Aqtóbe oblysynyń joǵary áleýeti men ekonomıkalyq ósý qarqynyna nazar aýdardy. Kezdesýge qatysýshylar aımaqtyń ósip-órkendeýine jol ashatyn jańa óndiris oryndaryn damytý jáne óńirge ınvestısııa tartý máselelerin de talqylady.
Sondaı-aq is-shara barysynda Qazaqstan halqy Assambleıasynyń HHHIV sessııasynda Memleket basshysy júktegen etnosaralyq qatynastardy nyǵaıtý jónindegi mindetter men bıyl qyrkúıek aıynda Astanada ótetin Álemdik jáne dástúrli dinder kóshbasshylarynyń VIII sezine daıyndyq aıasynda rýhanı dıplomatııany ilgeriletý tetikteri sóz boldy.
О́ńirdiń kreatıvti jastarymen kezdesýde bilimdi jas býynnyń eldi jańǵyrtý úderisindegi róline, olardyń boıyna jasampaz qundylyqtar men órshil ıdeıalardy sińirýdiń jáne óskeleń urpaqty júıeli qoldaýdyń mańyzyna basa mán berildi. Sonyń barysynda «Ulttyq qor – balalarǵa», «Bolashaq», «Jastar», «Keleshek» memlekettik bilim berý jınaqtaý júıesi jáne basqa da daryndy jastardyń áleýetin arttyrýǵa tyń múmkindikter beretin strategııalyq baǵdarlamalar men jeńildikter týraly aıtyldy.
«Qazaqstan ádilet ústemdik quratyn zamanaýı ári qýatty memleketke aınalýy kerek. Bul maqsatqa jastardyń qatysýynsyz qol jetkizý múmkin emes. Sebebi damý úshin tyń ıdeıalar, jańa kózqaras pen sarqylmas kúsh-qaırat kerek. Sondyqtan jas býynnyń tulǵa bolyp qalyptasýyna jaǵdaı jasap, olardyń boıyna ózin ózi damytý, úzdiksiz bilim alý, taldaý jasaý, emosıonaldyq ıntellekti shyńdaý sııaqty qabiletterdi darytý qajet. Bul rette durys qundylyqtarǵa jáne Prezıdent Qasym-Jomart Toqaev jarııalaǵan «Adal azamat» tujyrymyna taban tireý aıryqsha mánge ıe», degen palata spıkeri jastarǵa Senattyń zań shyǵarý qyzmeti men onyń negizgi baǵyttary týraly aıtyp berdi.
Sapar barysynda senatorlar Sıngapýr júıesi jáne basqa da ozyq bilim berý baǵdarlamalary boıynsha oqytatyn «Aqbobek» daryndy balalarǵa arnalǵan mektep-ınternatyna baryp, IT-kabınet, «Comics Room», óner, ádebıet zaldary men ózge de mamandandyrylǵan alańdardyń jumysymen tanysty. Buǵan qosa Parlament depýtattary múgedektigi bar balalarǵa arnalǵan «Qamqorlyq» ońaltý ortalyǵynyń jáne farfordan jasalǵan buıymdar shyǵaratyn «Zerde-Keramıka Aqtóbe» zaýytynyń eńbek ujymdarymen kezdesti.
