Men QR UQK ShQ Túrkistan oblystyq departamenti, Saryaǵash aýdany boıynsha Shekara basqarmasynyń ofıserimin. Shenim – maıor. Bul qyzmetke kezdeısoq kelgen joqpyn. Bul – meniń sanaly tańdaýym. Sebebi shekara – jaı ǵana geografııa emes, ol – el men eldiń arasy, tynyshtyq pen turaqtylyqtyń shebi, tarıhtyń qalyń taby jatqan qasıetti shek.
Shekara – bir ǵana syzyq emes, myńdaǵan jaýapkershilik
Búginde Qazaqstannyń memlekettik shekarasy shamamen 15 myń shaqyrymdy quraıdy. Onyń myńdaǵan shaqyrymy taýly, ormandy, shóleıtti, ózen-kóldi aýmaqtardy qıyp ótedi. Bul – bizdiń jumysty kúrdelendire túsedi. Biraq bizge eshbir aýa raıy, eshqandaı jer bederi tosqaýyl emes. Sebebi, el aldyndaǵy ant, ar aldyndaǵy jaýapkershilik bizge bir sát te bosańsýǵa múmkindik bermeıdi. Bul – el irgesiniń tynyshtyǵyn qamtamasyz etý úshin atqarylatyn aýyr ári abyroıly eńbek.
Tynyshtyq kúzetinde – tehnologııa men taktıka
Damyǵan zamanda shekarada jaı ǵana sholýshy bolý jetkiliksiz ekeni jasyryn emes .Shekarashy sarbazdar – taǵylymdy tehnokrat, sanaly strateg, paıymdy psıholog jáne otanshyl ofıser bola bilýi kerek. Árbir shekarashy – aqparat jınaı alatyn, qaýiptiń aldyn kóre biletin, tótenshe jaǵdaıda sheshim qabyldaıtyn kásibı maman bolýy tıis. Bul úshin biz aı saıyn oqý-jattyǵýlardan, taktıkalyq daıyndyqtan, atys jáne fızıkalyq daıyndyqtardan ótemiz. Sondaı-aq qyzmet barysynda jer seriktik baqylaý júıelerin, ushqyshsyz basqarylatyn drondardy, jedel áreket etýshi mobıldi toptardy qoldanamyz.
Halyqpen baılanys – shekara qaýipsizdiginiń kepili
Shekara boıyndaǵy eldi meken turǵyndary – bizdiń senimdi seriktesterimiz deýge bolady. Sebebi keıde zańsyz kóshi-qon, shekarany buzý, tipti jaıylymǵa maldyń ótip ketýi sekildi jaǵdaılar týyndaýy múmkin. Mundaıda jergilikti halyqpen til tabysý, túsindirý jumystaryn júrgizý – kúndelikti tirligimizdiń bir bóligine aınalǵan desek te bolady.
Biz úshin basty maqsat – qaýiptiń aldyn alý. Keı jaǵdaılarda aýa raıy qolaısyz, keıde kórinbeıtin qaýip kóp bolady. Biraq bizge júktelgen mindet – eldiń tynyshtyǵyn saqtaý, sondyqtan eshbir kedergige qaramaı jumys isteımiz.
Januıadan joǵary borysh bar
Árıne, shekarashynyń otbasyna da salmaq túsedi. Sebebi biz kóp jaǵdaıda úıde bolmaımyz. Balamyzdyń tusaýkeserinde, jarys kezinde nemese týǵan kúninde qasynan tabyla almaı qalý – úırenshikti jaǵdaı.
Biraq men balalarym men jubaıyma árdaıym myńdaǵan otbasynyń qaýipsizdigin kúzetip júrgenimizdi túsindiremiz. Biz, shekarashylar qyraǵy bolmasaq, shekarada bir sátke álsizdik paıda bolýy múmkin. Bul – el úshin úlken qaýip emes pe? Osyndaı sózder – meniń ǵana emes, búkil áskerı qyzmetkerlerdiń ishki aıqaıy.
Shekarany kúzetý – memleketti saqtaý
Tarıhta shekara kúzetilmegen eldiń taǵdyry ne bolǵanyn bilemiz. Qazirgi zaman – gıbrıdti qaýipter kezeńi. Sondyqtan biz tek shekarany ǵana emes, aqparattyq, kıber jáne ekonomıkalyq qaýipsizdik shekterin de saqtaýymyz kerek. Bul baǵytta shekarashylar – aldyńǵy sheptegi jaýyngerler.
Bizdiń basty ustanym – "Tynyshtyqtyń baǵasy – qyraǵylyq". Árıne, biz, shekarashylardyń qyzmetimiz osy sertke adaldyqpen ólshenedi.
Eldiń irgesi sógilmesin, shekaramyz berik bolsyn!
Shadııar Jumaqulov,
QR UQK ShQ Túrkistan oblystyq departamenti,
Saryaǵash aýdany boıynsha
Shekara basqarmasynyń ofıseri, maıor
