Shahardyń dál ortalyǵyndaǵy park súrilip jatyr. Oǵan sebep kezinde jekeshelendirý durys ótpeı, saıabaq jer telimin kásipkerler zańsyz ıemdengen. Sáıkesinshe zańsyz halyqqa qyzmet kórsetken. Qala ákimi Ǵabıt Syzdyqbekovtiń bastamasymen osy zańsyz áreketti toqtatyp, parktiń jer telimin memleket menshigine qaıtarý úshin ákimdik sotqa talap aryz berdi.
Sóıtip Shymkent qalasynyń mamandandyrylǵan aýdanaralyq ekonomıkalyq sotynyń sheshimimen aryz ıesi Shymkent qalasynyń jer resýrstaryn basqarý departamentiniń aryzy qanaǵattandyrylyp, «Qııal álemi» saıabaǵyn buzý týraly sot sheshimi zańdy kúshine endi.
O basta respýblıka dańǵylynyń boıynda ornalasqan saıabaq jasyl jelekpen kómkerilgen ádemi park bolǵan eken. Biraq keıin bul aýmaqty jalǵa alǵan jańa qojaıyndar parktiń ishine ártúrli attraksıondar ornatyp tastaǵan. Sot oryndaýshylar 9 attraksıon ıesine nysandaryn óz qarajaty esebinen buzý týraly habarlama bergenin aıtady. Alaıda, olar habarlamany alǵanmen ony oryndamaǵan. Soǵan baılanysty sot sheshimimen saıabaqtyń jer teliminde ornalasqan attraksıondar men basqa da qurylys nysandary kúshpen buzylyp, memleketke bastapqy kúıinde qaıtarylatyn bolady.
ShYMKENT
