Qazaqstannyń halyqaralyq bitimgerlik mıssııalarǵa qatysýy 2003 jyly alǵashqy ınjenerlik-saperlik «Qazbat» jasaǵynyń qurylýymen bastaldy. Bul eldiń beıbitshilik pen qaýipsizdik jolyndaǵy alǵashqy naqty qadamy boldy.
2014 jyly Qazaqstan alǵash ret óz áskerı qyzmetshisin BUU-nyń Batys Saharadaǵy mıssııasyna áskerı baqylaýshy retinde jiberip, halyqaralyq uıymmen resmı yntymaqtastyqty bastady.
Sodan beri qazaqstandyq bitimgerler Lıvan, Batys Sahara, Kot-d’Ivýar sııaqty túrli aımaqtarda beıbitshilik ornatýǵa atsalysyp keledi. 2024 jyly Qazaqstan BUU-nyń Afrıka men Taıaý Shyǵystaǵy mıssııalaryna qosymsha áskerı mamandar jiberdi. Ásirese Ortalyq Afrıka Respýblıkasy, Malı jáne Kongo Demokratııalyq Respýblıkasyndaǵy jaǵdaılar kúrdeliligimen erekshelendi.
Qazaqstan – TMD elderiniń ishinde BUU-nyń Golan jotalaryndaǵy mıssııasyna jeke mandatpen qatysýǵa ruqsat alǵan jalǵyz memleket. Qazirgi tańda elimizdiń 139 áskerı qyzmetshisi atysty toqtatý rejımin saqtaý sekildi mańyzdy tapsyrmalardy oryndaýda.
BUU kontıngentin óz betinshe ornalastyrý sheshimi normatıvtik-quqyqtyq bazany jetildirý men áskerı daıarlyq júıesin damytýǵa baǵyttalǵan aýqymdy jumystyń jemisi boldy. Osy proseste Almaty qalasynda qurylǵan Bitimgerlik operasııalar ortalyǵy mańyzdy ról atqaryp otyr. Ol bitimgerlerdi quqyqtyq, tildik, gýmanıtarlyq jáne psıhologııalyq turǵydan jan-jaqty daıyndaýmen aınalysady.
Qazaqstannyń bitimgerlik mıssııalarǵa qatysýy halyqaralyq qaýipsizdikke úles qosýmen qatar, elimizdiń jahandyq bedelin arttyryp, áskerı qyzmetshilerdiń kásibı mashyqtaryn jetildirýge múmkindik beredi. Olar kópultty ortada áreket etý tájirıbesin jınaqtap, jaýyngerlik daǵdylaryn shyńdaı túsedi.
