Foto: Aqorda
«Búginde toǵyz eldiń arsenalynda jalpy sany 13 myń ıadrolyq oqtumsyq bar. Sarapshylar ony qoldaný yqtımaldylyǵy artyp kele jatqanyn eskertedi. Tipti, buǵan jazataıym qatelik, oqys oqıǵa nemese eskalasııa sebep bolýy múmkin», dedi Prezıdent.
Memleket basshysy ıadrolyq synaqtyń zardabymen Qazaqstan áli kúnge deıin betpe-bet kelip otyrǵanyn aıtty.
«Bir ǵana jarylystyń saldary joıqyn bolmaq. Ǵalymdar atom bombasy túsken jerin kúl-talqan etip qana qoımaı, jahandyq aýqymdaǵy klımat apatyna ákep soǵýy, egistik ataýlyny joıyp jiberýi múmkin ekenin aıtady. Onyń qasiretin biz jaqsy bilemiz. Jerimizde jasalǵan 450 ıadrolyq synaqtyń zardabymen Qazaqstan áli kúnge deıin betpe-bet kelip otyr. Biz beıbitshilik úshin Keńes ókimetinen muraǵa qalǵan ıadrolyq arsenaldan óz erkimizben bas tarttyq. Búginde jappaı qyryp-joıatyn ıadrolyq jáne bıologııalyq qarýdy taratpaý ustanymyn jaqtaımyz», dedi Memleket basshysy.
Buǵan qosa, Qasym-Jomart Toqaev jahandyq qaýipsizdikke tóngen qater týraly tilgi tıek etti.
«Jahandyq qaýipsizdikke tóngen qaterge tek geosaıası sıpat turǵysynan qaramaý kerek. Muny moıyndaǵan jón.
Álemdegi qazirgi ahýal ózgerip jatyr. Mýltılateralızmniń úni qumyqqanda, proteksıonızm órshıdi. Osynaý beı-bereket kezeńdegi bizdiń mindetimiz – yntymaqty qatań saqtaý, ydyraǵan tusyn qaıta qalpyna keltirý», dedi Prezıdent.
Qasym-Jomart Toqaev Qazaqstan «Birligimiz – áralýandyqta» qaǵıdatyn qatań ustanatynyn aıtty.
«Qazaqstan qazirgideı almaǵaıyp zamandy syndarly yqpaldastyq turǵysynan qarastyrady. Syrtqy saıasatta jikke bólinbeı dıalogqa kelýdi, kez kelgen eldiń egemendigin qurmetteýdi basshylyqqa alamyz. Ásireultshyldyq tanytyp, ózge halyqtardyń tarıhy men mádenı dástúrlerin mensinbeýge jol berilmeıdi. Az halyqtardyń ana tilinde sóılep, tól mádenıetin dáripteýine qurmetpen qaraý qajet. Sondyqtan Qazaqstanda «Birligimiz – áralýandyqta» qaǵıdatyn qatań ustanamyz», dedi Memleket basshysy.
