Memorandýmǵa Konstıtýsııalyq Sot Tóraǵasynyń orynbasary Baqyt Nurmuhanov pen «Bas redaktorlar klýbynyń» prezıdenti, Parlament Senatynyń depýtaty Bıbigúl Jeksembaı qol qoıdy.
Baqyt Nurmuhanov qujattyń mańyzdylyǵyna toqtalyp, bul tek eki taraptyń resmı kelisimi ǵana emes, sonymen qatar azamattardyń quqyqtyq mádenıeti men quqyqtyq saýattylyǵyn arttyrýdaǵy ortaq jaýapkershilik ekenin atap ótti.
«Jarııalylyq pen ashyqtyq qaǵıdattary – konstıtýsııalyq baqylaý organdary qyzmetiniń ajyramas bóligi. Biz negizgi halyqaralyq organdardyń usynymdaryn qosa alǵanda, jalpyǵa birdeı standarttardy dáıekti túrde ustanamyz», dedi B.Nurmuhanov.
О́z kezeginde senator Bıbigúl Jeksembaı buqaralyq aqparat quraldarynyń qoǵam men konstıtýsııalyq baqylaý organy arasyndaǵy baılanystyrýshy kópir retindegi mańyzdy rólin atap ótti. Onyń aıtýynsha, jýrnalısterdiń mindeti – obektıvti ári jan-jaqty aqparatpen qoǵamdy qamtamasyz etý.
Senatordyń aıtýynsha, qazirgi ýaqytta klýb quramynda shamamen 300 medıa menedjer bar. Olardyń basym bóligi óńirlerde jumys isteıdi. Bul óz kezeginde aqparattyń taralý aıasyn keńeıtip, jergilikti jerlerdegi habardarlyqty arttyrýǵa yqpal etedi.
Kezdesý barysynda taraptar Qazaqstan Respýblıkasy Konstıtýsııasynyń 30 jyldyǵyna arnalǵan «Ata Zań – táýelsizdik tiregi» ulttyq is-sharalar josparyn iske asyrý máselesine erekshe nazar aýdardy. Konstıtýsıonalızm ıdeıalaryn ilgeriletý, azamattardyń quqyqtary men bostandyqtaryn qorǵaý, quqyqtyq saýattylyqty arttyrý, sondaı-aq qoǵamda konstıtýsııalyq qundylyqtardy nasıhattaý baǵytynda memlekettik ınstıtýttar men medıanyń kúsh-jigerin biriktirýdiń mańyzdylyǵy aıtyldy.
Is-shara sońynda taraptar qol qoıylǵan memorandým aıasynda birlesken aqparattyq-aǵartýshylyq is-sharalardy ótkizýge ýaǵdalasty.
Kezdesýge Konstıtýsııalyq Sottyń sýdıalary, apparatynyń basshylyq quramy jáne klýb músheleri – «Habar» telearnasynyń dırektory Jaınagúl Tólemisova, «Qazaq gazetteri» JShS bas dırektorynyń orynbasary Qambar Ahmet, «Abaı» telearnasynyń dırektory Erkin Muhamedjanov, «Qazcontent» AQ tóraǵasy Aına Zadabek, bas redaktorlar klýbynyń atqarýshy dırektory Bıbigúl Qulaman qatysty.
