Qazirgi tańda otandyq ádebıettiń eń kóp oqylatyn ári qazaqstandyqtardyń súıikti 100 kitabyn anyqtaýǵa arnalǵan jalpyulttyq saýalnama jalǵasýda. Búgin elordada Ulttyq quryltaı músheleriniń, jazýshylardyń, qoǵam qaıratkerleri men oqyrmandardyń qatysýymen taqyryptyq is-shara ótip, onyń barysynda aldyn ala qorytyndylar jarııa etildi. Qazirgi ýaqytta saýalnamaǵa 16 myńnan astam azamat qatysqan.
Uıymdastyrýshylar – Qazaqstandyq qoǵamdyq damý ınstıtýtynyń málimetinshe, daýys berý 23 shildege deıin jalǵasady. Otandyq avtorlardyń eń kóp oqylatyn 100 týyndysy 10 tamyz – Abaı kúni usynylady.
Joba 2025 jyly 23 sáýirde – Ulttyq quryltaı músheleriniń usynysy boıynsha bekitilgen Ulttyq kitap kúni bastaý aldy. Prezıdent Qasym-Jomart Toqaev atalǵan bastamaǵa qoldaý bildirdi. Memleket basshysy qoǵamda kitap oqý mádenıetin damytýdyń, sondaı-aq kitaptardyń qoljetimdiligin qamtamasyz etýdiń mańyzyn únime aıtyp keledi.
Is-sharada sóz sóılegen Májilis depýtaty, «AMANAT» partııasy fraksııasynyń múshesi, Ulttyq quryltaı múshesi Aıdos Sarym bul bastama ádebı talǵamnyń qalyptasýyna yqpal etip qana qoımaı, elimizdegi kitap ındýstrııasyna baıypty baǵdar beretinin atap ótti.
«Eger osy saýalnama nátıjesi boıynsha biz belgili bir kitaptardyń barlyq jerde barynsha kóp oqylatynyn biletin bolsaq, bul atalǵan týyndylardy qaıta basyp shyǵarýǵa, olardy nasıhattaýǵa jáne dáripteýge múmkindik beredi. Mundaı saýalnamalar – beıbereket aqparat aǵymyna qarsy turýdyń, ádebıetke turaqty jáne ǵylymı negizdelgen talǵam qalyptastyrýdyń bir joly. О́zge memleketterdegi sekildi, ýaqyt óte kele óz qundylyǵyn joǵaltpaıtyn kitaptar tizimi jasalady. Biz qoǵamdy ne tolǵandyratynyn, jastardyń, aǵa býynnyń qaı janrdy unatatynyn uǵyna alamyz. Bul jaı ǵana tizim emes, bul – dáýir aınasy», – dedi ol.
Aıdos Sarymnyń aıtýynsha, aralyq qorytyndy ár túrli jastaǵy azamattardyń, ár túrli tilde sóıleıtin toptardyń talǵamyna taldaý jasaýǵa múmkindik beredi. Sonymen qatar mundaı zertteýler baspagerlerge qandaı kitaptar suranysqa ıe jáne ne nársege nazar aýdarý kerek ekeni týraly málimet usynady. Joba qazirdiń ózinde mańyzdy mádenı oqıǵaǵa aınaldy. Sonyń kómegimen bolashaqta aýqymdy áleýmettik-mádenı zertteýler júrgizýge bolady.
Sonymen qatar «100 kitap» jobasy aıasynda qatysýshylardy yntalandyrý máselesi de qarastyrylǵan. «100 kitap» jobasynyń seriktesi – «Meloman-MARWIN» dúkender jelisiniń qoldaýymen 9000-shy, 10000-shy jáne 16000-shy daýys berýshilerge syılyq kartalary tabystaldy. Bul qadam oqyrmandarǵa jarqyn tosynsyı ǵana emes, otandastarymyz súıip oqıtyn 100 kitapty tańdaý prosesine azamattardy barynsha kóp tartýǵa qosymsha ynta boldy.
Máselen, 9000-shy daýys berýshi – Astana turǵyny Júsip Amantaı, 10000-shy qatysýshy – Qaraǵandy turǵyny Ásel Kóshen, al 16000-shy azamat – Aqtóbe turǵyny Gúljan О́tegenova.
Aıta keteıik, «AMANAT» partııasy kitap oqý mádenıetin ilgeriletýge belsendi atsalysýda. 2023 jylǵy qyrkúıek aıynan bastap partııa «Kitap-AMANAT» jobasyn qolǵa alyp, sonyń aıasynda el aýmaǵynda, ásirese shaǵyn qalalar men aýyldarda 23 kitap ortalyǵy ashyldy. Onda ádebı keshter, jazýshylarmen kezdesýler, túrli baıqaýlar ótedi. Barlyǵy 700-den astam is-shara ótkizildi. Kitaptar naryq baǵasynan tómen baǵamen satylady.
Ár qazaqstandyq azamat eGov Mobile mobıldik qosymshasy arqyly daýys berip, on kitapqa deıin tańdaý jasaı alady. Shyǵarmanyń ataýy men avtoryn da kórsetý qajet
