Ekonomıka mınıstrligi mundaı nátıjege ónerkásip pen qurylys salalarynan bastap saýda, kólik jáne baılanysqa deıingi negizgi salalardaǵy ósim qarqynynyń jedeldeýi yqpal etkenin atap ótti.
О́nerkásip óndirisi 6,4%-ǵa artqan. Eldiń 17 óńirinde ósim baıqaldy: eń joǵary ósim +22,9% kórsetkishimen ken óndirý, tyńaıtqyshtar, portlandsement pen qant óndirisiniń belsendi damýynyń nátıjesinde Jambyl oblysynda tirkeldi. Túrkistan jáne Jetisý oblystarynda óndiris 14,8%-ǵa, Almaty qalasynda 14,1%-ǵa ósti. Shymkent qalasynda ósim 18,9%-ǵa jetti.
Aýyl sharýashylyǵyndaǵy ósim 4,0%-dy qurady (qańtar-sáýir aılaryndaǵy 3,9%-ben salystyrǵanda). Eń aıqyn ósim Atyraý oblysynda (+10,4%), Soltústik Qazaqstan oblysynda (+7,5%) jáne Aqmola oblysynda (+6,5%) tirkeldi. Bul kórsetkishke negizinen mal men qus soıymynyń artýy sebep bolǵan. Túrkistan oblysynda ósim 6,3%-dy, Abaı oblysynda – 3,6%-dy, al Qostanaı oblysynda 4,8%-dy qurady.
Qurylys salasy da qarqyndy damyp 15,4%-ǵa ósim kórsetti. 18 óńirde ósim tirkeldi, al Mańǵystaý oblysynda mektepter, tushytqysh zaýyt, munaı jáne sý qubyrlaryn qaıta jańartý, aýdandyq aýrýhana jáne avtojoldardy jóndeý sııaqty aýqymdy jobalardyń arqasynda jumys kólemi eki esege artty. Qyzylorda oblysynda ósim 64,5%-dy, Qostanaıda – 57,8%-dy, Astanada – 51,8%-dy, Túrkistan oblysynda 46,6%-dy qurady. Turǵyn úı qurylysy da qarqyn alyp keledi: bes aıdyń ishinde 6 mln sharshy metrden astam turǵyn úı paıdalanýǵa berildi, bul byltyrmen salystyrǵanda 5,7%-ǵa kóp. Eń belsendi qurylys Túrkistan oblysynda (+25,5%), Shymkent qalasynda (+23,4%) jáne Almaty oblysynda (+20,4%) baıqaldy.
Negizgi kapıtalǵa salynǵan ınvestısııa 18,2%-ǵa artty. Bul ósim kólik, óndiristik jáne áleýmettik ınfraqurylymǵa, sondaı-aq jabdyqtar men jańa ónerkásiptik nysandarǵa baǵyttalǵan qarjy salymdarynyń esebinen qamtamasyz etilgen. Saýda aınalymy 7,8%-ǵa artty (qańtar-sáýir aıynyń qorytyndysyndaǵy 7,0%-ben salystyrǵanda).
Ishki saýda qurylymynda kóterme saýdanyń úlesi shamamen 68%-dy quraıdy. Osy jyldyń qańtar-mamyr aılarynda kóterme saýda 8,3%-ǵa, bólshek saýda 6,5%-ǵa ósti. О́sim qarqyny boıynsha Túrkistan oblysy (+66,2%), Aqmola oblysy (+48,9%) jáne Shymkent qalasy (+23,1%) aldyńǵy qatarda.
Baılanys jáne telekommýnıkasııa salasy 2,8%-ǵa ósti. Bul Internet jelisi qyzmetteri esebinen jetken meje (+13,9%). Kólik salasy 23,1%-dyq ósim kórsetti — bul kóbinese júk temirjol kóliginiń (+17%) jáne qubyr arqyly tasymaldaýdyń ósýine baılanysty tirkelgen nátıje (+13,8%). Eń joǵary ósim Jetisý oblysynda (+39,1%), Abaı oblysynda (+17,7%) jáne Aqtóbe oblysynda (+11,3%).
