Ýnıversıtet oqytýshylarynyń aıtýynsha, atalǵan jer ýchaskesi joǵary oqý ornynyń menshiginen zańsyz shyǵarylǵan. Stýdentter qalashyǵynyń qaq ortasynda turǵyn úı keshenin salý josparyna alańdaǵan ýnıversıtet ujymy «Amanat» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńeske shaǵym túsirgen. Osyǵan oraı partııa músheleri Almatydaǵy QazUAZÝ aýmaǵynda kóshpeli jıyn ótkizdi. Olardyń aıtýynsha, quqyq qorǵaý organdary tıisti shara qabyldaýǵa asyǵar emes.
Keńes tóraǵasy, Májilis depýtaty Erlan Saırov bul 2000-jyldardan beri sozylyp kele jatqan másele ekenin atap ótti. Sol kezeńde ýnıversıtet menshiginen úsh jataqhana, bes iri zerthana jáne jalpy aýmaǵy 6 gektarǵa jýyq birneshe jer telimi shyǵarylǵan. Solardyń biri kampýstyń dál ortasynda ornalasqan 96 sotyq jer telimi búginde daý-damaıǵa aınalǵan. Ýnıversıtettiń málimetinshe, «RAMS Kazakhstan» qurylys kompanııasy bul jerge bes kópqabatty turǵyn úı salýdy josparlaǵan.
– Biz munda jaı sózben emes, naqty ispen máseleniń mán-jaıyn anyqtaý úshin keldik. Bul – jeke tartys emes, memlekettik mańyzy bar másele. «Amanat» partııasy bul máseleni sheshýdi kópten beri talap etip keledi. Alaıda prokýratýra, Indýstrııa jáne qurylys mınıstrligi, Jer resýrstaryn basqarý komıteti naqty shara qabyldamaı otyr. Muny Memleket basshysy Qasym-Jomart Toqaevtyń zań ústemdigi men tártipti qamtamasyz etý saıasatyna ashyq túrde qarsylyq dep sanaımyn, – dedi E.Saırov.
Onyń aıtýynsha, Prezıdent Almatynyń qurylys máselesinde eń aldymen qurylys kompanııalarynyń emes, halyqtyń múddesi eskerilýi qajet ekenin birneshe ret aıtqan. «Jańa ákim Darhan Satybaldynyń kelýimen bul másele jaqyn arada sheshiledi dep úmittenemiz», dedi depýtat.
Qazir bul aýmaq ashyq turǵan shuńqyrǵa aınalǵan. Jaýyn men qar erigen saıyn ol tereńdep, jaqyn mańdaǵy ǵımarattardyń irgetasyn shaıyp, olarǵa qaýpin tóndiredi. Bul jaǵdaı qurylys jáne sanıtarlyq normalarǵa qaıshy keledi.
Keńes tóraǵasynyń aıtýynsha, qurylys jobasy 2023 jyly bekitilgen Almatynyń jańa Bas josparyna da sáıkes kelmeıdi. Qazirgi josparlaý boıynsha, bul aýmaq bilim berý aımaǵyna tıesili, sondyqtan munda turǵyn úı keshenin salýǵa bolmaıdy. Al Almaty qalasy ákiminiń orynbasary Beıbit Shahanov qurylys jumysy sot sheshimi shyqqanǵa deıin toqtatylǵanyn aıtty. Onyń aıtýynsha, qurylys salýshy kompanııa shuńqyrdy kómip, qorshaýdy alyp tastaýǵa tıis. Degenmen ruqsat qujattarynyń zańdylyǵyna júrgiziletin tekseristen keıin ǵana túpkilikti sheshim qabyldanady.
Ýnıversıtet ókilderi oqý ınfraqurylymyna tyǵyz qurylys júrgizýge jol bermeý qajet ekenin alǵa tartyp otyr.
– Stýdentterdiń sany jyl saıyn artyp keledi, al aýdıtorııa men zerthanalardyń sany azaıyp barady. Biz tek ǵımarattardan emes, sondaı-aq ǵylymı jáne bilim berý áleýetimizden de aıyrylyp jatyrmyz. Bul jerde buryn sheberhana, garaj, iri zerthanalar bolǵan, biraq bárin súrip tastady. Qazir bizde 7 myńǵa jýyq stýdent oqıdy, bolashaqta 10 myńǵa jetkizgimiz keledi. Alaıda jańa jataqhana men oqý korpýstaryn salýǵa bos jerdiń jetispeýshiligi basty másele bolyp otyr, – dedi QazUAZÝ basqarma tóraǵasynyń orynbasary Qýat Sultanǵazıev.
«Amanat» partııasy daýly jer telimin qosa alǵanda, ýnıversıtettiń zańdy menshigin qaıtarýǵa bar kúshin salatynyn málimdedi. E.Saırov bul máseleni Premer-mınıstr men Bas prokýrorǵa jetkizgenin aıtty. Ol atalǵan isti olardyń jeke baqylaýyna alý týraly resmı ótinish bildirgen.
Aıta ketsek, 2023 jyly Almaty qalasynyń prokýratýrasy QazUAZÝ-da bıýdjet qarajatyn jymqyrý faktilerin anyqtady. Qazir ýnıversıtet múlkin zańsyz ıelikten shyǵarý deregi boıynsha tergeý júrgizilip jatyr.
