О́ńirde «Jaıly mektep» ulttyq jobasy aıasynda 12200 orynǵa arnalǵan 9 birdeı «Jaıly mektep» paıdalanýǵa berildi. Bul óz kezeginde óńirdegi mektep tapshylyǵy men úsh aýysymda oqytý máselesin túbegeıli sheshýge múmkindik berdi. Atalǵan 9 mekteptiń 7-eýi Selınograd aýdanynda, al qalǵan ekeýi Kókshetaý qalasynda boı kóterdi. Osylaısha Selınograd aýdanynda oqýshy ornynyń tapshylyǵy segiz esege, al Kókshetaýda 1,5 esege qysqardy. Jalpy Aqmola oblysy - elimiz boıynsha alǵashqy bolyp josparlanǵan mektep qurylysyn ýaqytynda aıaqtaǵan óńirlerdiń biri.
–«Jaıly mektep» - bul jaı ǵana oqý orny emes, balalardyń sapaly bilim alýy úshin barlyq jaǵdaı jasalǵan zamanaýı bilim berý kesheni, – deıdi oblystyq bilim basqarmasy basshysynyń orynbasary Valerıı Gamazov, – sondaı-aq, munda bastaýysh, orta, joǵary synyptar úshin arnaıy jeke bloktar qarastyrylǵan. «Jaıly mektep» birneshe sport zaly, fızıka, hımııa, bıologııa pánderine arnalǵan zamanaýı zerthanalar, STEM-zerthanalar, robototehnıka kabınetteri qarastyrylǵan. Jalpy alǵanda, «Jaıly mektep» ulttyq jobasy óńirimizde kóptegen oqýshy men pedagogıkalyq ujym úshin zamanaýı, jaıly, sapaly bilim alýǵa múmkindik beretin orta qalyptastyrdy.
Kókshetaý qalasynda boı kótergen №20 mektep-gımnazııa «Jaıly mektep» ulttyq jobasy aıasynda salynǵan zamanaýı bilim berý kesheniniń biri. 1500 orynǵa arnalǵan jańa oqý ordasy qańtarda jumysyn bastady. Oqýshylar tek bir aýysymda oqıdy. Al ekinshi aýysymda oqýshylar sporttyq seksııalar, túrli úıirmeler, shyǵarmashylyq baıqaýlar men is-sharalarǵa qatysa alady.
–Keleshek mektepteriniń ereksheligi, bul árkimniń qoly jetetin, eshqandaı emtıhansyz qabyldanatyn barlyq oqýshylardy qabyldaýǵa daıyn mektep, –deıdi №20 mektep-gımnazııasynyń dırektory Manargúl Toqan, –osy ǵımarattyń ishinde 356 kabınet jumys jasap tur. Onyń ishine laborotorııalar, oqý kabınetteri, basqa da jumys jasaıtyn qyzmetkerlerdiń orny jeke-jeke taǵaıyndalǵan. Ekinshi jartyjyldyqty bul mektepti 60 muǵalim aıaqtady. Aldaǵy ýaqytta oqýshylardyń jınaýyna baılanysty taǵy da muǵalimderdiń sany artady dep kútilip otyr.
Jalpy alǵanda, oblys aýmaǵynda bilim berý ınfraqurylymyn jańǵyrtý jumystary qarqyndy júrgizilip jatyr. Qazir óńirdiń taǵy birneshe eldi mekeninde jańa mektepterdiń qurylysy qolǵa alynǵan. Máselen, Selınograd aýdanyna qarasty Jańajol jáne Jarqaıyń aýdanynyń Birsýat aýylynda 80 orynǵa shaqtalǵan mektep salynýda. Sondaı-aq, Kókshetaýda 500 oryndyq №10 mektep pen Stepnogorsk qalasyna qarasty Bestóbe kentinde 300 oryndyq bilim ordasynyń qurylysy júrip jatyr. Barlyq mektep zamanaýı qural-jabdyqtarmen qamtamasyz etiledi.
Aqmola oblysy
