«Ortalyq Azııa – Qytaı» II ındýstrııalyq-ınvestısııalyq yntymaqtastyq forýmy aıasynda Aqmola oblysynyń ákimi Marat Ahmetjanov Qytaıdyń birqatar memlekettik kompanııalarynyń ókilderimen kezdesýler ótkizdi. Kezdesýler barysynda ózara seriktestik pen ınvestısııalyq jobalardy júzege asyrý máseleleri talqylandy.
Atap aıtqanda, óńir basshysy jel generatorlaryn óndirý jáne jel elektr stansııalaryn salý salasyna mamandanǵan Windey Energy Technology Ltd. Co kompanııasynyń basshylyǵymen kelissóz júrgizdi. Taraptar óńir aýmaǵynda jel elektr stansııasyn salý jobasyn júzege asyrý múmkindigin qarastyrdy. Qytaılyq tarap Arshaly aýdanynda týrbınalar ornatylǵanyn jáne jobany keńeıtýge múddeli ekenin jetkizdi. Qazirgi ýaqytta óndiristi jergiliktendirý, jelige qosylý jáne tehnıkalyq toraptardy anyqtaý máseleleri pysyqtalýda. Jaqyn arada taraptar Arshaly jáne Ereımentaý aýdandaryndaǵy áleýetti alańdardy egjeı-tegjeıli zerdelemek.
Oblys ákimi Qytaıdyń dástúrli jáne balamaly energetıka salasyndaǵy iri óndirýshileriniń biri – State Power Investment Corporation kompanııasynyń basshylyǵymen kezdesti. Delegasııany Shanghai Electric Power Co., Ltd. kompanııasynyń bas dırektory jáne SPIC-tiń halyqaralyq jobalar jónindegi dırektorlar keńesiniń tóraǵasy Hýan Chen bastap keldi.
Kelissóz barysynda taraptar respýblıkalyq mańyzy bar «Aqmola» ındýstrııalyq aımaǵy aýmaǵynda óndiristik qýattar men qosalqy bólshekter óndirisin jergiliktendirý boıynsha yntymaqtastyq múmkindikterin talqylady. Atalǵan aımaq elordaǵa irgeles ornalasqan jáne qajetti ınjenerlik ınfraqurylymmen tolyq qamtamasyz etilgen.
О́ńir basshysy Aqmola oblysynda turaqty energetıka baǵytyndaǵy jumystar júıeli túrde júrgizilip jatqanyn aıtty. Búgingi kúni oblysta jalpy quny 284 mlrd teńgeni quraıtyn jańartylatyn energııa kózderi boıynsha 17 joba júzege asyrylǵan. 2024 jyldyń qorytyndysy boıynsha oblystaǵy elektr energııasy óndirisinde jańartylatyn kózderdiń úlesi 78,5 paıyzdy qurady. Al 2025 jyldyń qańtar-aqpan aılarynda oblystyń respýblıkadaǵy «jasyl» ekonomıkany damytýǵa qosqan úlesi 30 paıyzǵa jetti.
Aıta keteıik, júrgizilgen zertteýlerge sáıkes óńirdegi jeldiń ortasha jyldamdyǵy sekýndyna 7-12 metrdi quraıdy, bul jel elektr stansııalary úshin ońtaıly kórsetkish bolyp sanalady.
Qytaılyq delegasııa SPIC kompanııasynyń qatysýymen Aqmola oblysynda jobalardy iske asyrýǵa qyzyǵýshylyq bildirip, óńirdegi qolaıly ınvestısııalyq ahýaldy jáne uzaqmerzimdi seriktestikke ázirlikti atap ótti.
Shanghai Electric Power Co., Ltd. kompanııasynyń bas dırektory Hýan Chen Qytaı tarapy úshin Qazaqstan energetıka salasyndaǵy syrtqy yntymaqtastyqtyń basym baǵyty bolyp sanalatynyn erekshe atap ótti.
Kelissózderdiń qorytyndysy boıynsha birlesken jumys toptaryn qurý jáne ınvestısııalardy qorǵaý týraly kelisim jobasyn daıyndaý jóninde ýaǵdalastyqqa qol jetkizildi.
О́ńir ákimi mundaı jobalardy júzege asyrý myńdaǵan jańa jumys ornyn ashýǵa, óndiris kólemin arttyrýǵa jáne oblystyń eksporttyq áleýetin nyǵaıtýǵa múmkindik beretinin atap ótti.
Aqmola oblysy.
