Qatysýshylar eki taqyryptyq sessııa barysynda jergilikti bastamalardy qoldaý jáne jergilikti ózin-ózi basqarýdy damytý máselelerin, sondaı-aq memlekettik áleýmettik tapsyrys jáne úkimettik emes uıymdarmen is-qımyl salasyndaǵy zańnamany jetildirý tásilderin talqylady. Is-sharaǵa memlekettik organ men azamattyq qoǵam ókilderi, sarapshylar men ÚEU músheleri qatysty.
«Ulttyq quryltaı otyrystarynda Prezıdent azamattyq belsendilikti turaqtylyqtyń negizi dep birneshe márte atap ótip, memleket pen qoǵam arasyndaǵy baılanysty jańa sapaǵa kóterý qajetin alǵa tartty. Sondaı-aq Memleket basshysynyń bastamasymen 2026 jyl «Halyqaralyq eriktiler jyly» dep jarııalandy. Bul – volonterler qozǵalysyn halyqaralyq deńgeıge shyǵarýdyń biregeı múmkindigi», dedi Mádenıet jáne aqparat vıse-mınıstri Aızada Qurmanova.
Jıynda Qazaqstandyq qoǵamdyq damý ınstıtýtynyń Basqarma tóraǵasy Nurbek Matjanı Memleket basshysynyń saıası reformalary týraly pikirin ortaǵa saldy.
«Keıingi jyldary elde tereń ári turaqty ózgerister bolyp, bılik qurylymymen qatar qoǵam damýynyń negizi de jańardy. 2022 jyly Memleket basshysy óz Joldaýynda aýqymdy saıası jańǵyrý baǵdarlamasyn jarııalap, irgeli ózgeristerge jol ashty. Prezıdent qolyndaǵy shekten tys bılikten bas tartqany, sýperprezıdenttik basqarý úlgisinen yqpaldy Parlamenti, esep beretin Úkimeti bar prezıdenttik respýblıkaǵa kóshkeni – reformalardyń irgetasy boldy. Osydan úsh jyl burynǵy referendým nátıjesinde Konstıtýsııanyń úshten bir bóligi ózgertildi. Keıinnen ondaǵan zań men kodekske túzetýler engizildi. Osy ózgerister arqyly bılik tarmaqtarynyń arasynda tepe-teńdik ornatylǵan, zaman talaptaryna saı jáne syn-qaterlerge beıimdelgen jańa memlekettik basqarý úlgisi qalyptasty», dedi QQDI Basqarma tóraǵasy Nurbek Matjanı.
Qazirgi zamanǵy saıasat ınstıtýtynyń dırektory Sergeı Konovalov azamattyq sanany jańǵyrtý men memlekettik basqarýdyń tıimdiligin arttyrýdaǵy úkimettik emes uıymdardyń róline toqtaldy.
«Saıası reformalar men jalpyulttyq maqsattardyń óńirlik deńgeıde júzege asýyn talqylaý – búgingi reformalar aıasynda ózekti másele. Azamattyq sananyń óńirlerde qanshalyqty tez ózgeretini basty nazarda bolýy kerek. Bul rette úkimettik emes uıymdardy memlekettik basqarýǵa belsendi tartý mańyzdy. Olar joǵary quzyretke jáne belsendilikke ıe. Sondaı-aq memlekettik qyzmetkerlerdi salalyq ÚEU-da taǵylymdamadan ótkizý kadr daıarlaýdyń tıimdi joly bolýy múmkin», dedi sarapshy.
Basqosýda basqa da qatysýshylar baıandama jasap, talqylanǵan máselelerge qatysty óz oıyn aıtyp, suraq-jaýap almasty.
