Degenmen aı saıyn ózgerip kele jatqan qala kelbetine kóleńke túsiretin jaǵdaılar da az emes. Mysaly, osy kúni aınalasyndaǵy atshaptyrym aýmaq qorshalǵan kóp ǵımarattyń janynan júrý múmkin bolmaı qaldy. Keıbir meıramhanalar men dámhanalar ıeleri jaıaý júrginshiler jolyn «basyp» alyp, basqalar úshin bas aýyrta qoımaıtynyn, bireýdiń quqyna qol suǵýdan qysylmaıtynyn tanytty.
Osydan da oblys ákimi Nurlybek Nálibaevtyń turǵyndardyń júrip-turýyna kedergi keltirip, shahardyń kórkin buzatyn zańsyz qurylystarǵa qatysty naqty tapsyrma bergenine qýanǵandar kóp boldy. Tapsyrmaǵa sáıkes oblys aýmaǵynda ruqsatsyz salynǵan qurylys nysandaryn anyqtap, zań aıasynda tıisti sharalar qabyldaý úshin arnaıy komıssııa qurylyp, jumysyn bastap ketti.
Qala ákimdigi men tıisti mekemeler ókilderinen jasaqtalǵan komıssııa júrgizgen tekseristerge turǵyndar da belsene qatysyp keledi. Osy arqyly sáýlet talaptaryn saqtamaý, trotýarlardy zańsyz qorshaý, abattandyrý qaǵıdalaryn buzý sııaqty zańbuzýshylyqtardyń birqatary anyqtaldy.
Qalanyń qaq ortasyndaǵy Jeltoqsan kóshesindegi №22 úıdiń 17-18-páterin turǵyn emes úı-jaı retinde tirkep, dúken ashýǵa ruqsat alǵandar jobadan aýytqyp, trotýardy zańsyz qorshap, memlekettik jerdi ıemdenip kelgen. Komıssııa músheleri jaıaý júrginshiler jolyn taryltyp, sanıtarlyq talaptardy buzǵan nysan ıesine qorshaýdy aldyryp, quzyrly organdar zańǵa sáıkes tıisti sharasyn qabyldaıtyn boldy.
Qalalyq sáýlet jáne qala qurylysy bóliminiń málimetinshe, oblys ortalyǵynda 158 nysan tekserilip, tıisti oryndarǵa 95 ǵımarat ıesine shara qoldaný jóninde usynys berilipti.
«Tekserý kezinde buryn jumys istep, keıin órtenip ketken «Nurmaǵanbet» dámhanasynyń ornyna zańsyz salynyp jatqan dámhana anyqtalyp, oblystyq memlekettik sáýlet jáne qala qurylysy basqarmasyna hat joldandy. Qala ortalyǵyndaǵy «Soho» meıramhanasynyń terrasa qurylysynda da eshqandaı talap, ereje saqtalmaǵan. Kásipker ǵımaratyn ruqsatsyz keńeıtken. Meıramhana basshylyǵyna eskertý berilip, sharalar qabyldaý úshin tıisti oryndarǵa habarlama berildi. «Loft» meıramhanasynyń ıesi janyndaǵy «Veranda» kóshe dámhanasyn salý úshin qurylys turmaq, jerdiń de qujatyn rásimdemegen. Kásipkerge zańǵa sáıkes tıisti sharalar kórildi», deıdi qalalyq Sáýlet jáne qala qurylysy bóliminiń basshysy Dinmuhambet Syrlybaev.
Áleýmettik jelidegi osy máselege baılanysty jazbalar da nazardan tys qalyp jatqan joq. Mysaly, jaqynda belsendi qala turǵyny Abaı dańǵyly boıynda aıaqjoldyń biraz bóligi ekonomıkalyq tergeý departamenti ǵımaratyna salynyp jatqan qorshaý aýmaǵyna enip ketkeli turǵany jaıly jazba qaldyrypty. Buǵan oblys ákimdiginiń baspasóz qyzmeti jedel jaýap berip, oblys basshysynyń turǵyndar jolyn taryltyp, qala kelbetin ketiretin nysandardy buzý týraly qala ákimine tapsyrma bergenin habarlady. Qala ǵana emes, aýdandarda da zańsyz qurylystardy tekseretin komıssııalar qurylǵan. Komıssııa múshelerine turǵyndarmen tyǵyz qarym-qatynasta jumys isteý tapsyrylypty.
Buǵan qosa qalalyq sáýlet jáne qala qurylysy bólimi aınalasyn lastap, nysandardy paıdalaný talaptaryn saqtamaıtyndarmen de kúresti jalǵastyryp keledi. Osy baǵytta da jurtshylyq tarapynan qoldaý az emes. Bul – zań men tártiptiń barshaǵa ortaq mindetke aınalyp kele jatqanynyń aıqyn kórinisi.
Qyzylorda
