Sýǵa batýǵa shaq qalǵan 2 áıeldi qutqarǵan
Oqıǵa 2022 jyly Botaqara kentine taıaý mańdaǵy ózen mańynda bolǵan. Rostovka aýylynyń ýchaskelik polısııa ınspektory Batyrhan Seıdiǵalıev adamdardyń sýǵa batyp bara jatqanyn aıtyp Medet Asqarovtan kómek suraıdy.
Kelinshektiń biri tereńge qaraı júzip ketip, sýǵa bata bastaǵan. Ony kórip, qutqarý úshin sońynan júzgen qurbysyn da ıirim tereńine tarta bergen. Sol ýaqytta Batyrhan kelinshekke kómekke umtylǵan, biraq sý jutyp qoıyp, tunshyǵyp, abdyrap turyp qalǵan. Sóıtip ózenniń dál ortasynda, ıiriminiń qatty tusynda turǵan úsheýine de qaýip tónedi.
Olardy dál ýaqytynda kelgen Medet Asqarov qutqarady. Aldymen áriptesiniń qolynan tartyp, oǵan ana kisiniń qolynan ustaýdy túsindirip, jıekke alyp shyǵady. Sodan keıin sýǵa batyp ketken ekinshi kelinshekti qutqarý úshin súńgip, ony jaǵaǵa alyp shyqqan eken.
«Medet Aqylbekuly kelip, úsheýmizdi de qutqaryp qaldy. Erligine bas ıemiz. Sóıtsek, biz batqan jerge shomylýǵa bolmaıdy eken. Júzý bilgenimizben dáp sol tusta ıirim bar bolǵandyqtan sýǵa battyq. Bizge ony Qudaı jiberdi, aman qaldyq, oǵan alǵysymyz sheksiz!», dep eske alady eki kelinshektiń biri Inga Kósherbekova.
Jol-kólik oqıǵasynan 2 adamdy aman alyp qalǵan
Sol jyly qarasha aıynda Botaqara kentiniń turǵyny Tilegen Sákenov qas qaraıǵan shaqta jumysynan úıine bara jatyp, jýyrda ǵana alǵan jańa kóligimen aýdarylyp qalady. Shoshynyp qalsa kerek, esik ashýǵa qaýqary bolmaǵan. Muny jol ústinde kele jatqan Medet Aqylbekuly baıqap qalǵan.
«Azdaǵan boran ári kóktaıǵaq edi, rólge ıe bola almaı, eki ret aýdarylyp tústik. Esimnen tanyp qalyppyn. Kók tútinniń ıisi shyǵa bastady. Kóligimniń ishinde qaýipsizdik beldigin bosata almaı jatqan kezde Medet Asqarov kelip, áýeli qasymdaǵy jolaýshyny, sodan soń meni syrtqa shyǵardy. Ol bolmaǵanda kóligimiz órtenip, sonyń ishinde qalyp qoıar ma edik. Tártip saqshysyna myń alǵys!», dep eske alǵan eken kólik júrgizýshisi.
5 balany kók tútinniń ishinen alyp shyqqan
2018 jyly jeltoqsan aıynda Botaqara kentinde kópqabatty úıdiń birinen órt shyǵady. Sol joly qaharman polıseı 5 balany otqa oranǵan úıden syrtqa aman alyp shyǵady.
Dalada burqasyn boran bolatyn. Túnniń bir ýaǵynda úıdegiler uıqyǵa ketkende peshtiń daladaǵy murjasy qulap, tútin keri úıge kirgen. Áıel adam kózin ashyp, oıanǵan mezette úıdiń ishi kók tútin eken, joldasy vahtalyq jumysqa ketken bolatyn. Tórt balasy uıyqtap jatqan edi. Mınýt saıyn dem alý qıyndaı túsken kók tútin basqan úıinen 5 aılyq balasyn qolyna alyp júgire shyǵyp, tútinnen qarlyǵyp qalǵan bar daýsymen kómek suraǵan.
Medet Aqylbekuly úıine kelip, kóliginen túsip jatqan kezde, kórshiles úıden júgire shyqqan bir áıeldiń omyraýdaǵy balasymen súrinip qulaǵanyn kóredi jáne kómek surap, janushyra aıǵaılaǵan daýysyn estıdi. Úıinde órt bolyp jatqanyn, tórt balasy úıdiń ishinde qalyp qoıǵanyn estip, úreıge boı aldyrǵan áıel adamdy áýeli sabyrǵa shaqyryp, sodan soń, dym kórinbeıtin kók tútin basqan úıdiń ishine birden kirgen.
«Úıine júgirip kirip, eńbektep alyp izdedim. Qolyma aıaǵy ilikken balalardy syrtqa shyǵaryp otyrdym. Áıelime aıtyp, jedel járdem shaqyrttyq», deıdi tártip saqshysy.
Ana úshin balalarynyń amandyǵynan artyq qandaı baqyt bar?! Jansulý Asanqyzy sol oqıǵa týraly áli kúnge deıin tolqyp eske alady.
«Bir mezette kórshi úıde turatyn polıseı jigittiń kóliginen túsip maǵan qaraı júgirip kele jatqanyn baıqadym. Polısııa qyzmetkeri eń aldymen meni sabyrǵa shaqyryp, mán-jaıdy túsingen soń, kók tútin jaılaǵan úıge kirip ketip, uıyqtap jatqan tórt balamdy kezekpen alyp shyǵyp óz úıine apardy. Sonyń arqasynda balalarym aman qaldy. Eger sol kúni ol bolmaǵanda, qandaı qaıǵy bolaryn elestetý de qorqynyshty. Qazir alty balanyń anasymyn. Medet Aqylbekulyna alǵysym sheksiz», deıdi Jansulý Sedenova.
Erlik – el esinde
Qaraǵandyda ottan, sýdan jáne jol-kólik oqıǵasynan toǵyz adamdy qutqaryp qalǵan polıseı erlikterin jumystan tys ýaqytta jasaǵan.
Atalǵan erlikteri eskerilip polısııa qyzmetkeri mınıstrliktiń «Quqyq tártibin qamtamasyz etýge qosqan úlesi úshin» medalimen nagradtaldy. Memleket basshysynyń Jarlyǵymen qyzmettik boryshyn atqarý kezinde kórsetken batyldyǵy men janqııarlyǵy úshin II dárejeli «Aıbyn» ordeni keýdesine taǵyldy.
Medet Aqylbekuly Qarqaraly aýdanynyń Táttimbet aýylynda 1987 jyly dúnıege kelgen. 1997 jyly Buqar Jyraý aýdanyndaǵy Botaqara kentine kóship kelip, sol kentte mektepti támamdaǵan soń, bir jyl jumys isteıdi. Odan keıin áskerı boryshyn óteý úshin Petropavl qalasyna attanady. Áskerden kelgen soń eki aıdan keıin kúzet polısııasyna jumysqa ornalasyp, onda 2007-2009 jyldary jumys istep, al 2009-2013 jyldary patrýldik polısııa bóliminde eńbek etti. 2013-2014 jyldary Buqar jyraý aýdanynda kezekshiniń kómekshisi, 2014-2021 jyldary ýaqytsha ustaý ızolıatorynda júrgizýshisi, 2021-2023 jyldary patrýldik polısııada jumys istedi. 2023 jyldan osy ýaqytqa deıin ýchaskelik polısııa ınspektory bolyp qyzmet atqaryp keledi. Ol úıdegi 7 uldyń ortanshysy. Ákesinen jastaı aıyrylyp qalǵan. Eshkimniń ala jibin attamaý, qajet kezde qol ushyn sozýdy ana tárbıesinen darytqan. Aǵasy Oralbek (kezekshi bóliminde) pen baýyry Jaras ta (jedel ýákil) qyzmetterin osy salada atqaryp júr. Sol aǵasyna qarap, bala kezinen polıseı bolýdy armandaǵan Medet Aqylbekuly 15 jyl serjant boldy, 2021 jyly ofıser shenin aldy. Onyń elge adal qyzmet etýge ant qabyldaǵanyna 19 jylǵa jýyqtapty. Kelinshegi Aıgúl ekeýi tórt bala tárbıelep otyrǵan úlgili otbasy.
Mereke qarsańynda Qaraǵandy oblystyq Polısııa departamentiniń murajaıynda erlikti umyt qaldyrmaı, jas qyzmetkerlerge úlgi etý maqsatynda «Erlik – el esinde» atty taǵylymdy is-shara ótip, oǵan qaýip-qater mezetterinde azamattarǵa qol ushyn sozyp, batyl áreketke barǵan polısııa qyzmetkerleri men olardyń qutqarǵan turǵyndary shaqyryldy. Batyrlyq – bir kúndik emes, ómirlik qasıet. Endeshe Medet Asqarov sekildi qaharmandardyń erlikteri jas polıseılerge qashanda úlgi bolyp qala bermek.
