Qala aýmaǵynda sýǵa shomylýǵa bolmaıtyn 16 ýchaske bar. Biraq aptapqa shydamaǵan úlken de, kishi de ondaı eskertýlerdi eleı bermeıdi.
Oblystyq bilim basqarmasynyń bólim basshysy Parasat Jańabergenovtiń aıtýynsha reıdter mamyr aıynyń 25-nen bastap kúndelikti uıymdastyrylyp keledi. Degenmen qadaǵalaýsyz qalǵan balalar tyıym salynǵan jerlerde shomylyp, onyń arty ókinishti jaǵdaılarǵa ulasyp jatqan oqıǵalar bar. «Úlkender balalardy baqylaýdy kúsheıtip, olardy bos ýaqytynda tegin úıirmelerge qatystyrsa», deıdi ol.
Oblystyq TJD azamattyq qorǵanys basqarmasynyń bastyǵy Jandos Júginisov jyl basynan beri túrli sebeptermen 14 adam sýǵa ketkenin aıtady, onyń jeteýi bala. Reıdter barysynda 13 azamatqa eskertý jasalyp, keıbir turǵyndarǵa hattamalar toltyrylǵan.
Turǵyndar qaýipsizdigi úshin uıymdastyrylatyn reıd jumystary jalǵasa beredi.
