Invataksı qyzmetinde dıspetcher bolyp jumys isteıtin ol taǵdyr taýqymetine tótep berip, tabandylyq tanytyp keledi. Shaǵyn dıspetcherlik ortalyqta qashanda qarbalas. Úzdiksiz qońyraý shalynyp, jolaýshylar shuǵyl ótinishterin jetkizip jatady. Syrttaı qaraǵanda tomaǵa-tuıyq, qarapaıym keńse bolǵanymen, qaınap jatqan tirshiliktiń tutqasyn ustap otyrǵan erekshe taǵdyr ıesi ekenin ańǵara da qoımaısyz.
–Men ekinshi toptaǵy múgedekpin, eki aıaǵymnan aırylǵanmyn. 2007 jyldyń jeltoqsan aıynda oqys oqıǵaǵa dýshar boldym, – deıdi Oral Qabylov, – qazir protezben júremin. Jalǵyz járdemaqymen jan baǵý qıyn. Sondyqtan, talpyný qajet boldy. О́zim sııaqty adamdardy, túrli qaýymdastyqtar men uıymdardy izdedim. Meniń túsinigimde jalǵyzdyqpen ári sharasyzdyqpen kúresý úshin orta qajet. Memleket tarapynan qoldaý kórsetilgenimen árkim ózi qolynan keletin sharýany istep umtylǵany durys qoı. Eń bastysy, úmit úzilmeýi kerek.
Ol súıikti jar, qamqor áke. Úı sharýasyna da únemi aralasyp, kórshilerine de qolǵabysyn tıgizedi. Aıtpaqshy, bul ortalyqta taǵdyrlas birneshe adam bar.
–Invataksı qyzmetin 2011 jyly bastadyq. Sol ýaqyttan bastap Qazaqstan múgedekter uıymynyń odaǵy jumysyn jandandyra tústi, – deıdi «Shans» múmkindigi shekteýli jandardy ońaltý ortalyǵynyń tóraǵasy Vasılıı Shımanskıı, – qazirgi áleýmettik baǵdarlamalardy júzege asyrý birshama qıyndyq týǵyzady. Bul jerde alty adam jumys isteıdi. Shyn máninde mundaı adamdarǵa jumys tabý óte qıyn. Olar da munyń barlyǵyn jaqsy túsinedi. Jumystaryna jaýapkershilikpen qarap, tapsyrylǵan isti tııanaqty atqaryp otyrady.
Taǵdyrdyń alǵa tartqan taýqymetin arqalap júrse de keler kúnderdiń jaqsylyq sharapatynan kúder úzbegen qaıratty jandar osynysymen jalpaq jurtqa úlgi.
Kókshetaý
