Keńótkel aýylynyń mańyndaǵy qorymnan Saq dáýirine tıesili eki adamnyń máıiti tabyldy. Ǵalymdardyń boljamynsha, bireýi er adam, ekinshisi áıel bolýy múmkin. Al, qola buıymdar saq dáýirindegi kún keshken áıeldiń tegin adam bolmaǵandyǵyn aıǵaqtaıdy.
–Temir dáýirine tán jerleý dástúriniń saqtalǵandyǵy anyqtalyp otyr. Qorymdaǵy súıekter ertedegi temir dáýiri dástúrlerine tán, – deıdi Qazaqstan Respýblıkasy Ulttyq mýzeıi mádenı murany ǵylymı zertteý ınstıtýtynyń basshysy Perdehan Musyrmanqul, – sol zamannyń ǵuryptyq tas, qola aına, pyshaq sııaqty zattarymen birge belbeý bólikteri ǵajap dúnıe. Kókshetaý óńirindegi kóne tarıhqa jańa kózqaraspen qarap, ǵylymı turǵyda qalyptastyrýǵa múmkindik beretin derekter.
Máıittiń súıegi birshama jaqsy saqtalypty. Ǵalymdar aldaǵy ýaqytta anropologııalyq zertteýge jibermek. Ǵylymı qaýymdastyq bul oljany elimizdiń arheologııa salasyndaǵy mańyzdy jańalyq dep baǵalap otyr.
–Er adamnyń belbeýinde órnektelgen Saq stılinde jasalǵan buıymdar tabylyp otyr, – deıdi Qazaqstan Respýblıkasy Ulttyq mýzeıi mádenı murany ǵylymı zertteý ınstıtýtynyń ǵylymı qyzmetkeri Danııar Dúısenbaı, – mal súıekteriniń qaldyqtary da tabyldy. Oǵan qosa, oshaq qaldyqtary da qolymyzǵa ilikti. Biz úshin bul óte qundy. «Qara arheologtardyń» nazaryna ilinbeı, aman qalǵan olja bizge buıyryp otyr.
Qazir arheologtar Kenjebaı qorymynda tabylǵan máıitterdi osy óńirdiń turǵyndary degen uıǵarymǵa kelip otyr. Aldaǵy ýaqytta Imantaýdyń eteginde de dál osyndaı qazba jumystary júrgizilmek.
Aqmola oblysy
