– Valerıı Erkeshuly, siz Reseıde dúnıege keldińiz, Ýkraına men Estonııada ómir súrdińiz. Alaıda búginde Qazaqstan azamatysyz jáne osy eldiń týy astynda jarystarǵa qatysasyz. Mundaı sheshimge ne sebep boldy?
– Men Reseıdiń bir aýylynda, Shyǵys Qazaqstannan shyqqan qazaq otbasynda dúnıege keldim. Balalyq shaǵymnan bastap túrli tilder men mádenıetter ortasynda óstim. Keıin Ýkraınada bilim alyp, áskerı flotta qyzmet ettim, al Estonııada turyp jatqanyma qyryq jyldan asty. Biraq júregimde qazaqy bolmyspen baılanys eshqashan úzilgen emes.
60 jasqa kelgende óz sheshimimdi shyǵardym. Endi men óz tarıhı otanym – Qazaqstannyń atynan jarysqa qatysamyn dep túıdim. Bul – sanaly, júrekten shyqqan jáne patrıottyq sheshim boldy. Bul men úshin Qazaqstan halqy Assambleıasynyń ıdeıasyna saı áreket – óz tegińe qurmetpen qaraý, basqa ult ókilderimen ózara túsinistik pen syılastyqta ómir súrý.
– Sporttaǵy jolyńyz qalaı bastaldy?
– 50 jasymda, tek densaýlyqty jaqsartý maqsatynda júgirýdi bastadym. Biraq sportqa birden ǵashyq boldym. Sol kezde-aq jasqa qaramaı damý men jeńiske jetýge bolatynyn túsindim. Qazir jeti eldiń chempıonymyn, Eýropa vıse-chempıonymyn jáne jas sanatym boıynsha álemdik úzdik ondyqqa kiremin. Bul – men úshin úlken maqtanysh. О́ıtkeni bul tek sport emes, sonymen qatar adamdar arasyndaǵy dostyqty nyǵaıtatyn áleýmettik qozǵalys. Bul – Qazaqstan halqy Assambleıasynyń negizgi ıdeıalarynyń biri.
– Masters Athletics Kazakhstan federasııasynyń qurylýy týraly aıtyp berińizshi. Bári qalaı bastalyp edi?
– 2021 jyly biz bar bolǵany 12 adamnan bastadyq. Qazir uıymdastyryp jatqan jarystarymyzǵa 300-400 adamǵa deıin qatysady. Bul endi jaı sporttyq uıym emes, naǵyz qozǵalysqa aınaldy. Bizge ardager sportshylar da, jastar da keledi. Bastysy kez kelgen jasta bastap, jetistikke jetýge bolatynyn dáleldep júrmiz.
Bul qozǵalys tek sport týraly emes, bul adam rýhy, jeńiske degen jiger, ómirdi súıe bilý týraly. Qazaqstan halqy Assambleıasy mundaı bastamalardy qoldaıtynyna senemin. О́ıtkeni bul – urpaqtardy, aımaqtardy, ulttardy biriktiretin kúsh.
– ALATAU 2025 týrnırine qatysý siz úshin neni bildiredi?
– Bul men úshin úlken qurmet. Almatyda ótetin bul týrnır Ortalyq Azııa úshin alǵashqy ári eń aýqymdy doda bolmaq. Munda kásibı sportshylar da, áýesqoılar da, túrli ult pen eldiń ókilderi jınalady. Elimizdiń týyn kóterip, osy dodada bolý men úshin maqtanysh.
Aıtpaqshy, týrnırdiń seriktesi – Qazaqstan halqy Assambleıasy arnaıy «Etnosaralyq tatýlyqty nyǵaıtýǵa qosqan úlesi úshin» atty marapat taǵaıyndady. Bul óte mańyzdy qadam. О́ıtkeni sport halyqtar dostyǵy men ózara qurmettiń eń kúshti quraldarynyń biri.
– Sońǵy suraq. Qazaqstan halqyna ne aıtqyńyz keledi?
– Barshańyzdy ALATAU 2025 týrnırine shaqyramyn! 6-8 shilde kúnderi Almaty qalasyndaǵy Olımpıadalyq daıarlyq ortalyǵyna kelip, sportshylardy qoldaıyq! О́ıtkeni sport – tek jarys emes, ulttar dostyǵynyń kópiri. Bul birlik pen bolashaqqa degen senimniń manıfesi. Rasynda bul – Qazaqstan halqy Assambleıasynyń rýhyn naqty ispen kórsetý alańy.
-Áńgimeńizge, rahmet!
