Foto: baribar.kz
Jalpy kópshilikke baǵyttalǵan usynystardy turmysta ustaný - sý tapshylyǵynyń aldyn alýǵa aıtarlyqtaı kómek.
Vedomstvo usynysynda mynadaı ádister bar:
Kir jýǵysh jáne ydys jýǵysh mashınalardy tek tolyq júktememen paıdalaný, tisti jýǵanda krandy jaýyp, sýdy arnaıy ydysqa quıyp paıdalaný, vanna qabyldaýdyń ornyna qysqa dýsh qabyldaý, kókónis pen jemisterdi ydystaǵy sýmen jýý, avtomatty sensorly krandardy qoldaný, ýnıtazdarǵa eki deńgeıli sý jiberý júıesin ornatý; sý aǵynyn retteıtin arnaıy saptamalar (aeratorlar) paıdalaný; sondaı-aq krandardaǵy aqaýlardy únemi baqylap, sýdyń aǵýyn der kezinde joıý.
Endi osy keńester el aýmaǵynda arnaıy bannerlerge jazylyp, nasıhattalmaq. Mınıstrlik bannerlerdi jergilikti atqarýshy organdardyń qoldaýymen Qazaqstannyń barlyq óńirindegi kóshelerde, bilim berý mekemelerinde, temirjol vokzaldarynda, áýejaılarda jáne basqa da qoǵamdyq oryndarda ornalastyrýdy kózdep otyr.
«Biz turmysta sýdy únemdeýdiń mańyzyn múmkindiginshe kóp adamǵa jetkizgimiz keledi. Árbir azamat eldiń sý resýrstaryn saqtaýǵa úles qosa alady. Mınıstrlik ázirlegen usynystar sýdy únemdeý – ońaı ári tıimdi ekenin kórsetip otyr. Endi biz aqparattyq-túsindirý jumystaryn kúsheıtip, bul qarapaıym tásilder týraly Qazaqstannyń barlyq óńirine jetkizgimiz keledi», dedi Sý resýrstary jáne ırrıgasııa mınıstri Nurjan Nurjigitov.
