Quryltaı sheteldegi qazaq balalarynyń tarıhı Otanyna degen súıispenshiligin arttyrý, ulttyq qundylyqtar men salt-dástúrlerdi tereńirek tanýyna múmkindik jasaýdy maqsat etti. Joba aıasynda qatysýshylar ulttyq-mádenı baǵdarlama negizinde arnaıy daıyndalǵan tanymdyq jáne tárbıelik sharalarǵa belsene qatysty.
Bul ıgi bastama bıyl Tımýr Qulybaevtyń Halyk qaıyrymdylyq qory men Dúnıejúzi qazaqtarynyń qaýymdastyǵy arasyndaǵy turaqty seriktestik nátıjesinde uıymdastyryldy.
«О́tinish bildirgen qandastardyń arasynan túrli salada jetistikke jetken, júldeger jáne daryndy balalar irikteldi. Sharanyń basty maqsaty – sheteldegi qazaq balalarynyń Atajurtymen baılanysyn nyǵaıtý. Qazaqtyń tili men dástúrin tereńirek tanyp, óz tamyryn sezinýge jol ashý. Bul olardyń bolashaqta Otanyna oralyp, eldiń damýyna úles qosýyna úlken múmkindik beredi», dedi Dúnıejúzi qazaqtary qaýymdastyǵy tóraǵasynyń keńesshisi Qarlyǵash Bekpatshaqyzy.
Quryltaıda ulttyq qundylyqtardy dáripteýmen qatar, balalarǵa bıznes, zamanaýı kásipter men áleýmettik jeliniń múmkindikteri týraly mańyzdy dárister oqyldy. Sondaı-aq, bıylǵy baǵdarlamada etnomýzykalyq sabaqtar, ulttyq aspaptarmen tanysý, mýzeılerge barý jáne tarıhı jádigerlerdi zertteý sekildi baǵyttar qamtyldy.
«Tımýr Qulybaevtyń Halyk qory Dúnıejúzi qazaqtarynyń qaýymdastyǵyn birneshe jyl qatarynan qoldap keledi. Bıylǵy shara osy qoldaýymyzdyń aıqyn dáleli. Sheteldegi ár qazaq balasy – ulttyń amanaty. Biz olardy týǵan jerge tartý arqyly ana tilin jáne ulttyq mádenıetin saqtaýǵa kómekteskimiz keledi. Bizdiń basty maqsatymyz – balalar bul sapardan tek jaqsy áser alyp qana qoımaı, óz bolmysyn sezinip qaıtýy», dedi Halyk qaıyrymdylyq Atqarýshy dırektory Aıgúl Saparǵalıqyzy Ahmetova.
Joba aıasynda Halyk qaıyrymdylyq qory balalardyń shyǵarmashylyq qabiletin damytýǵa úles qosý maqsatynda oqý-saýyqtyrý ortalyǵynyń mýzykalyq kabınetin tolyq jabdyqtaýǵa qarjylaı qoldaý kórsetti.
Mońǵolııadan kelgen 13 jastaǵy Injý Qazaqstanǵa alǵash ret kelip otyrǵanyn aıtyp, erekshe qýanyshymen bólisti.
«Men Qazaqstanǵa kelýdi kópten armandadym. Ájem únemi «Seniń eliń – Qazaqstan» dep aıtyp otyratyn. Endi óz Otanymdy kórip, basqa elderdegi qazaq balalarymen dos bolý armanym oryndaldy. Ana tilinde sóıleı alatynym úshin maqtanamyn» , dedi jas qatysýshy.
Aıta keteıik, Halyk qaıyrymdylyq qory – Tımýr Qulybaev jetekshilik etetin kommersııalyq emes uıymdardyń biri. Qor densaýlyq saqtaý, bilim berý, áleýmettik qorǵaý, mádenıet jáne sport salalarynda aýqymdy áleýmettik jobalardy júıeli túrde júzege asyryp keledi. Sonymen qatar, bıyldan bastap qor sheteldegi qazaq balalaryna týǵan jermen baılanys ornatýǵa múmkindik beretin jańa bastamalardy qolǵa aldy. Bul jobalar olardyń ulttyq bolmysyn saqtaýyna, qazaq tilin meńgerýine jáne tarıhı tamyryn tereń tanyp-bilýine baǵyttalǵan. Mundaı jumystar bir rettik shara emes, qor qyzmetiniń basym jáne uzaq merzimdi baǵyttarynyń biri bolmaq.
Al Dúnıejúzi qazaqtarynyń qaýymdastyǵy – 33 jyldyq tarıhy bar halyqaralyq qoǵamdyq uıym. Qaýymdastyq respýblıkadan tysqary, shetelderde turatyn qazaq dıasporasymen jan-jaqty baılanys ornatý, mádenı jáne bilim berý máseleleri boıynsha qoldaý kórsetý maqsatynda qurylǵan.
Sonymen qatar, qaýymdastyq tarıhı otanyna qonys aýdarǵan qandastarǵa áleýmettik qoldaý kórsetip, qaıyrymdylyq sharalaryn júıeli túrde uıymdastyrady.
