Áskerı bilimge – eldik kózqaras

Senator Amangeldi Nuǵ­manov Aqtóbe oblysynyń ákimi Ashat Shaharovpen kezdesýde Prezıdent tapsyrmalaryn iske asyrý, aýmaqtardy áleý­mettik-ekonomıkalyq damytý, halyqtyń ómir súrý sapasyn jaqsartý máselelerin talqylady.

Sondaı-aq ol jergilikti bılik ókilderimen Talǵat Bıgel­dınov atyndaǵy Áýe qorǵanysy kúshteriniń Áskerı ınstıtýtynda bolyp, kýrsanttardyń oqý úderisimen, patrıottyq jáne áskerı bilim berý tárbıe­simen tanysty. Depýtat ınstı­týtty qoldaý qajettigin aıtyp, áskerı bilimdi damytý jónindegi usynystar Par­lament pen salalyq organdarda pysyqtalatynyn atap ótti.

«Talǵat Bıgeldınov atyn­daǵy Áskerı ınstıtýt Qarýly Kúshterge joǵary bilikti ofı­serlerdi daıarlaıdy. Oqý orny sapaly áskerı jáne akade­mııalyq daıyndyqty qam­tamasyz etip qana qoımaı, kýrsant­tardyń boıynda pat­rıottyq rýhty, azamattyq jaýap­­­kershilik pen Otanǵa degen adal­dyq­ty qalyptastyrýǵa aıanbaı atsalysyp keledi. Instı­týt qazir elimizdegi jetekshi áskerı bilim ortalyqtarynyń birine aınalyp otyr», dedi A.Nuǵmanov.

Senator «Jaıly mektep» jobasy boıynsha Mártók aýdanyndaǵy Saryjar aýylynda salynyp jatqan jańa mektep qurylysymen de tanysty. Ol qurylysty ýaqtyly aıaqtaý, onyń qaýipsizdigi men bilim berý ortasynyń zamanaýı talaptarǵa sáıkes kelýin eske saldy.

Al Senat depýtattary Álı Bektaev, Murat Qadyrbek jáne Alısher Satvaldıev Túrkistan oblysynyń halqymen júzdesip, óndiristik jáne áleýmettik birqatar nysandardy aralady. Olar sondaı-aq jergilikti bılik pen bıznes ókilderimen birqatar máseleni talqylady.

Senatorlar Sozaq aýdanyna sapar barysynda 200 oryndyq jańa sporttyq-saýyqtyrý kesheniniń qurylysymen tanysty. Olar merdiger mekeme ókilderine jumystyń qarqyny men sapasyn, qurylys normalaryn saqtaý qajettigin aıtty. Ásirese ýran óndirýmen aınalysatyn «Qazatomónerká­sip-Saýran» kásipornynyń qyz­metine erekshe nazar aýda­ryldy. Jumysshylarmen jáne jergilikti turǵyndarmen kez­desý barysynda óndiris qaýipsizdigi, ekologııa jáne halyq­tyń densaýlyǵyna áseri týraly máseleler kóterildi. Turǵyndar óndiristik nysan­darǵa jaqyn ornalasqan eldi mekenderde, ásirese balalar arasynda aýrýdyń kóbeıip bara jatqanyna alańdaýshylyq bildirdi. Senatorlar VIII saı­lanǵan Parlamenttiń III ses­sııasynda qabyldanǵan Sý, Bıýdjet jáne Salyq kodeks­teriniń jańa nusqalary týraly aıtyp, ónerkásip júktemesinen zardap shekken óńirlerdi qoldaýǵa keshendi is-qımyl qajet ekenin aıtty.

Qazyǵurt aýdanynyń egis­tiginde bolǵan senatorlar agrarshylarmen ónimdilikti arttyrý, sýbsıdııa jáne tehnıkamen qamtamasyz etý máselelerin talqylady. Sony­men qatar depýtattar Túlkibas aýdanynda jylyna 800 tonnaǵa deıin ónim óndire alatyn «First fish company» balyq ósirý kásipornynyń, sondaı-aq jyl saıyn 30 myń tonnaǵa deıin sút óńdeıtin «Maılykent Sút» kooperatıviniń jumysymen tanysty. Kooperatıv aldaǵy jospary boıynsha 4 myń bas­­qa arnalǵan jańa sút fermasyn iske qosýdy josparlap
otyr.

Buǵan qosa olar «Aqsý-Jabaǵyly» saýyqtyrý-ońaltý ortalyǵyn keńeıtý jobasymen de tanysty. Onda 250 adamǵa arnalǵan jańa ǵımarat salynyp, 200 jumys orny ashylmaq.

Senatorlar Saıram aýdanynda ornalasqan birqatar kásiporyndy da kórip shyqty. Eńbek ujymdarymen kezdesýde orta jáne joǵary bilim berý, jol ınfraqurylymynyń jaı-kúıi, densaýlyq saqtaý, aýyl sharýashylyǵy jáne aýyz­sýmen qamtamasyz etý máse­leleri talqylandy.