Áskerı orkestr mýzykasy oınaǵan saltanatty ashylý rásimine Shymkent garnızonynyń bastyǵy podpolkovnık Sergeı Bıbýlatov, Ál-Farabı aýdanynyń ákimi Maratbek Myqtybekov, kásipkerler qaýymdastyǵynyń ókilderi men áskerı qalashyq turǵyndary qatysty.
Alǵashqy sózdi alǵan podpolkovnık Sergeı Bıbýlatov búgingi oqıǵanyń erekshe mańyzǵa ıe ekenin atap ótti. Sebebi ózi de bala-shaǵasymen osy qalashyqta turady. Sondyqtan ata-ana retinde barsha otbasynyń qýanyshyna ortaq ekenin jetkizdi.
«Qurmetti Maratbek Sámenbekuly, osy qalashyqtyń turǵyny retinde balalarymyzdyń qyzyqty balalyq shaǵy úshin eńbek etip, ter tógip jatqanyńyz úshin sizge úlken alǵysymdy bildiremin. Aldaǵy ýaqytta da birlesken jumysymyz nyǵaıa túsedi dep senemin. О́ıtkeni, balalar – bizdiń bolashaǵymyz», dedi ol.
О́z sózinde aýdan ákimi alǵashqy kúnderden bastap jobanyń júzege asýyna belsendi atsalysqan barlyq kásipkerlerge óz atynan alǵys aıtty.
«Osynaý balalar men sport alańshasynda ósken búldirshinderimiz erteńgi kúni shynyǵyp, bolashaqta myqty sportshy men eljandy patrıottar bolyp ósetinine senimdimin. Qolǵa alǵan bastamamyz turǵyndardyń kóńilinen shyqty degen oıdamyz. Endi olar bos ýaqyttaryn paıdaly ári tıimdi maqsatqa jumsaıtyn bolady» dedi ol.
Aıta ketý kerek oıyn alańshasy birneshe aımaqtan turady: bir bóliginde kishkentaı balalarǵa arnalǵan qaýipsiz oıyn alańy ornalassa, ekinshi jaǵynda eresek balalarǵa arnalǵan sporttyq jabdyqtar men jabyq mını-fýtbol alańy jaıǵasqan. Alańnyń aınalasynda demalýǵa arnalǵan oryndyqtar men bastyrmalar qoıylǵan. Bul balalaryn ertip kelgen ata-analarǵa jaıly jaǵdaı týǵyzý úshin arnaıy osylaı jasalǵan.
Shymkent
