Olar ózderiniń alaıaqtyq tásilderin paıdalanyp zergerlik buıym saýdasynan 5 aı boıy aı saıyn 40-60 paıyzdan tabys túsiremiz dep adamdardy aldap kelgen. Sonymen birge qarjy pıramıdasyn uıymdastyrýshylar salymshylardy ózderiniń salymdarynyń senimdi qolda ekenin aıtyp barynsha sendirgen. Olar aqshalarynyń eshqaıda joǵalyp ketpeıtinine ýáde berip, kez kelgen jaǵdaıda bastapqy quıǵan qarajattaryn qaıtaryp beretinderin aıtyp ábden senimderine kirgen. Alaıda «ótiriktiń arty bir tutam» demekshi, alaıaqtardyń ádemi sózderiniń syrtynda kádimgi halyqty aldaý jolymen aqshasyn jymqyrý áreketi jatty. Jeme-jemge kelgende zergerlik buıymdardyń saýdasynan salymshylarǵa eshqandaıda da paıda túsken joq, barlyq tólemder pıramıdaǵa jańadan kirgen qurbandardyń esebinen tólenip otyrdy. Deı turǵanmen alaıaqtardyń qaltasyna túsetin tabys azaıǵan sátte álgi qarjy pıramıdasynyń da irgetasy shetinen kúıreı bastady.
Búgingi tańda eki júzdeı adam alaıaqtardyń qurbanyna aınalyp otyr. Olar «Ansar Gold» qarjy uıymyna 400 mln teńge qarajattaryn óz qoldarymen senip tapsyrǵan. Qısapsyz aǵylǵan qarjyny qalaı jasyrýdyń, bankomattan bildirmeı sheship alýdyń jolyn oılastyrǵan alaıaqtar jaqyn týystarynyń járdemine ıek artqan.
Qazaqstannyń Qarjy monıtorıngi agenttiginiń resmı ókili Ernar Taıjannyń málimdeýinshe kúdiktiler ózderiniń týystaryn drop retinde paıdalanǵan. Iаǵnı bankomattaǵy qarajatty qoldaryna túsirý úshin týystarynyń banktik kartalaryn ýaqytsha ala turǵan. Osy atalǵan qarjy pıramıdasyn uıymdastyrǵan azamat quryqtalyp, qazir ýaqytsha ustaý ızolıatorynda qamaýda jatyr. Al onyń jeke múlki bolyp tabylatyn úıi men avtokóligi bolsa tárkilendi.
Shymkent
