D.Seksenbaev dárigerlikpen qosa ulaǵatty ustaz boldy, ǵalym retinde kóp izdenister júrgizdi. Sondyqtan onyń ómir joly kópke ónege. Ásirese onyń adaldyq pen eńbekqorlyq qasıeti medısına mamandyǵyn tańdaǵan jastar úshin úlgi bolýy tıis.
Deribsaly 1939 jyldyń qańtarynda Qyzylorda oblysy, Aral aýdanyna qarasty Uıaly aýylynda dúnıege keldi. Balalyq shaǵynan eńbekke erte aralasyp, traktor aıdap, qurylys alańynda jumys istedi. Biraq, ol bala kezinen dáriger bolýdy armandaýshy edi. Bul arman ony 1956 jyly Almaty memlekettik medısına ınstıtýtyna jeteledi. Oqýyn támamdaǵan jas maman Maqtaaral aýdandyq aýrýhanasyna jumysqa turady. Dárigerlik óziniń súıip tańdaǵan mamandyǵy bolǵandyqtan óz kásibine barynsha adal bolýǵa tyrysty.
1964 jyly oblystyq klınıkalyq aýrýhananyń keýde hırýrgııasy bóliminiń meńgerýshisi atandy. Bul qyzmetti taban aýdarmaı 26 jyl atqardy. 1990 jyldan 2002 jylǵa deıin osy aýrýhananyń bas dárigeri qyzmetin atqardy. Medısınalyq mekemeni zamanaýı qurylǵylarmen jabdyqtaýǵa, halyqaralyq tájirıbelerdi engizýge bastamashylyq tanytty. Bul – óńirlik medısınanyń serpindi damý kezeńi edi. Osy istiń basy-qasynda Deribsaly aǵamyz turdy.
«Bilim alyp ınemen qudyq qazǵan» Deribsaly Seksenbaıuly bar bilgenin shákirtterine úıretip ketti. Ońtústik Qazaqstan medısına akademııasynda hırýrgııa kafedrasyn ashýǵa atsalysty. Bul oqý ordasy úshin tarıhı oqıǵa edi. Jańashyl ǵalym medısınalyq akademııaǵa zamanaýı apparattar ornatyp, jańasha emdeý ádisterin oqytty. Onyń basshylyǵymen fakýltettik jáne gospıtaldy hırýrgııa kafedrasy qurylyp, búgingi tańda ony qanshama maman bitirip shyqty.
Ǵalym retinde ol ár kúnin izdenis pen zertteýge arnady. Hırýrgııanyń eń kúrdeli salalary sanalatyn torakaldy, abdomınaldy, irińdi hırýrgııa boıynsha ǵylymı eńbekter jazdy. Onyń bastamasymen 2000 jyly oblystyq aýrýhanaǵa alǵash ret zamanaýı jabdyqtar ákelinip, Qazaqstanda tuńǵysh ret laparoskopııalyq otalar jasaldy. Keıin bul tájirıbe ózge óńirlerge de keńinen taralyp, myńdaǵan adamnyń ómirin saqtap qalýǵa kómektesti.
60 jyldyq eńbek jolynda D.Seksenbaev 34 myńnan astam ota jasap, halyqtyń alǵysyn arqalady. Onyń ishinde 47 jyldan astam ýaqyt Ońtústik Qazaqstan medısına akademııasynda dáris oqyp, izbasar tárbıeledi. Búginde onyń shákirtteri elimizdiń túkpir-túkpirinde abyroıly qyzmet atqaryp júr. Tipti arasynda óte keremet jetistikterge jetken mamandar da bar.
Ǵalym kózi tirisinde 400-den astam ǵylymı eńbek jazdy, 7 irgeli eńbek jarııalap úlgerdi. Onyń «Jaıylmaly irińdi perıtonıtti keshendi baǵalaý jáne emdeý» atty doktorlyq dıssertasııasy medısına ǵylymynda óte joǵary baǵalandy. «Qazaqstan hırýrgtary» qaýymdastyǵynyń múshesi bolǵan ol respýblıkalyq ǵylymı konferensııalarda 27 márte baıandama jasaǵan.
Eren eńbegi eskerilgen ǵalym «KSRO densaýlyq saqtaý isiniń úzdigi» tósbelgisimen, VDNH SSSR kúmis medalimen, QR Densaýlyq saqtaý mınıstrliginiń Qurmet gramotalarymen, «Qazaqstan Respýblıkasynyń eńbek sińirgen dárigeri» ataǵymen marapattaldy. Memleket tarapynan beriletin eń joǵary marapattardyń biri «Parasat» ordenin ıelendi. Jáne biregeı marapat «Altyn skalpel» ıegeri atandy.
D.Seksenbaev aramyzdan ketse de artynda óshpes iz qaldyrdy. Onyń murajaıda saqtalǵan skalpelinen talaı jan shıpa tapty. Sondyqtan adamdardyń alǵysyna bólengen azamattyń esimi eshqashan umytylmaq emes.
Dılara BIMENOVA, Ońtústik Qazaqstan medısına akademııasynyń baspasóz hatshysy
