Foto: Sý resýrstary jáne ırrıgasııa mınıstrligi
Búginde «Qazsýshardyń» Túrkistandaǵy fılıaly Maqtaaral aýdanynyń sharýalarymen sýarmaly sý berýge 3 223 kelisimshart jasasqan, al Jetisaı aýdany boıynsha 1 492 kelisimshart jasalǵan. Qazirgi ýaqytta Jetisaıda sýarmaly jer kólemi – 47 332 ga, Maqtaaralda – 27 255 ga.
Odan keıin mınıstr «Mashınalyq ádispen sý kóterý kanalynyń» jumysymen tanysty. «Qazsýshardyń» Túrkistandaǵy fılıaly nysandy mehanıkalyq jolmen tazalaýdy aıaqtap qaldy.
«Kelisimshart jasaǵan sý paıdalanýshylarmen mindettemelerdi oryndaý úshin kanaldar boıynsha kezekpen sý berý júrgiziledi, al mınıstrliktiń jumys toby men Aral-Syrdarııa basseındik ınspeksııasy sý paıdalanýdyń zańdylyǵyn qatań baqylaýda ustaıdy. Sondaı-aq sýdy kelisimshartsyz tutynǵandarǵa jáne sý jetkizýshiniń kelisiminsiz ósiriletin daqyldardyń túrin ózgertkenderge aıyppul qarastyrylǵan. Biraq dıqandar da sý únemdeý tehnologııalaryna kóship, ylǵaldy kóp qajet etetin daqyldardy egýdi azaıtý arqyly sý resýrstaryn únemdeýge óz úlesterin qosýy kerek. Memleket bul úshin sýbsıdııalar túrinde barlyq qajetti jaǵdaıdy jasady», dedi mınıstr N.Nurjigitov.
Sý resýrstary jáne ırrıgasııa mınıstrliginiń málimetinshe bıyl Túrkistan oblysynda kúrish egý jospary 3,3 eseden asyp ketken. Sýarmaly sý tapshylyǵy qaýpine jáne 4000 ga shekti kólemge qaramastan, «Qazsýshardyń» jergilikti fılıaly dıqandarmen 13 258 ga kúrish alqaptaryn sýarýǵa 1 047 kelisimshart jasasqan. Osyǵan baılanysty fılıaldyń birqatar basshysyna qatań sógis berildi.
Buǵan deıin sala mınıstrligi elimizdiń ońtústiginde sýarý kezeńiniń turaqty ótýin qamtamasyz etý úshin arnaıy jumys toptaryn qurǵan bolatyn. Bul toptar jergilikti atqarýshy organdarmen birlesip táýlik boıy kezekshilik júrgizedi. Atalǵan oblystaǵy vegetasııalyq kezeń mınıstrliktiń baqylaýynda tur.
