Atalǵan jarysqa «Auyl sport – 2024» respýblıkalyq týrnıriniń jeńimpazdary – Soltústik Qazaqstan oblysy Qyzyljar aýdany Beskól aýylynyń qyzdar komandasy men Almaty oblysy Qarasaı aýdany Úshqońyr aýylynyń uldar komandasy qatysqan. Qarapaıym jattyǵý zalynan bastalǵan sporttyq jol, Qyrǵyzstan tórindegi halyqaralyq dodada jeńispen aıaqtaldy.
Uldar arasyndaǵy fınalda Úshqońyr komandasy Qyrǵyzstannyń Chý oblysy Mramornoe aýylynyń ujymyn 2:0 esebimen utyp, chempıon atanǵan. Qyzdar arasyndaǵy tartysty oıynda Beskól aýylynyń voleıbolshy qyzdary qola júldege qol jetkizdi.
Beskól komandasynyń jattyqtyrýshysy Anastasııa Eınıkıs jarysqa qatysýǵa múmkindik bergen Halyk qaıyrymdylyq qoryna alǵysyn bildirdi.
«Bul jarysqa biz «Auyl sport» jobasynda chempıon bolǵan qurammen qatystyq. Halyk qorynyń qoldaýy arqasynda halyqaralyq deńgeıdegi saıysqa alǵash ret qatysyp, qola júldeger atandyq. Qyrǵyzstanda alǵash ret bolyp otyrmyz. Qordyń bul jobasy bolashaqta da jalǵasyn taýyp, jaqsy nátıjeler ákeletinine senemiz», dedi ol.
Komanda oıynshysy Taısııa Vysoskaıa da jarystyń mańyzdy tájirıbe bolǵanyn aıtyp ótti.
«Halyqaralyq týrnırge birinshi ret qatysyp turmyn. Bul men úshin úlken tájirıbe boldy. Qarsylastarymyz myqty boldy, degenmen biz jaqsy oınap nátıje kórsettik. Úshinshi oryn jeńip aldyq. Halyk qoryna alǵysymyz sheksiz, osy sapardyń arqasynda shekara asyp, el namysyn qorǵadyq», deıdi voleıbolshy.
Halyk qaıyrymdylyq qorynyń Atqarýshy dırektory, «Auyl sport» jobasynyń jetekshisi Ǵalymbek Jaqsylyquly balalarǵa qoldaý kórsetý qordyń basty mindetteriniń biri ekenin atap ótti.
«Qor balalarǵa árdaıym qoldaý bildirýge nıetti. Ásirese aýylda ósken talantty balalardyń úlken arenaǵa shyǵýyna jaǵdaı jasaýǵa qashanda daıynbyz. Osyndaı jobalar arqyly olardyń bolashaǵyna baǵyt berip, senim syılaı alamyz. Bul qoldaý budan ári de jalǵasady», dedi Ǵalymbek Jaqsylyquly.
«AUYL SPORT» – Tımýr Qulybaev basqaratyn Halyk qaıyrymdylyq qorynyń 2024 jyldan bastap iske qosqan aýqymdy áleýmettik jobasy. Baǵdarlama aýyldyq jerlerde buqaralyq sportty damytýǵa, talantty balalardy qoldap, olardy kásibı sportqa baýlýǵa baǵyttalǵan. Qazirdiń ózinde bul joba aıasynda elimizdiń ár óńirinen 10 myńnan astam bala túrli sport túrimen turaqty túrde aınalysyp keledi.
Jobanyń tıimdiligin dáleldeıtin taǵy bir mysal – Serbııada ótken GYMNASIADE halyqaralyq jarysynda aýyldan shyqqan 12 sportshynyń 6 medal jeńip alýy. Endi osy tájirıbe Kazakhstan Open aıasynda jalǵasyp, aýyl sportshylary halyqaralyq deńgeıge senimdi qadam basyp otyr.
Aıta keteıik, Halyk qaıyrymdylyq qory – elimizdegi eń iri áleýmettik bastamalardy júzege asyryp kele jatqan uıymdardyń biri. Qor búginge deıin jalpy 120-dan astam áleýmettik jobany iske asyryp, 85 mıllıard teńgeden astam qarajat jumsaǵan. Onyń ishinde tek aýyl sportyn qoldaýǵa 500 mıllıon teńgege jýyq qarjy bólingen.
