Foto: Aqorda
Prezıdentke ulttyq kompanııa qyzmetiniń nátıjeleri týraly málimet berildi. Talǵat Aldybergenovtiń aıtýynsha, bıylǵy birinshi jartyjyldyqtyń qorytyndysy boıynsha eksplýatasııalyq júk aınalymy 8,6 paıyzǵa ulǵaıǵan. Tranzıt tasymalynyń kólemi 14,6 mıllıon tonnaǵa jetken.
Qasym-Jomart Toqaevqa transulttyq temirjol dálizin qalyptastyrý úshin 1700 shaqyrymnan astam jańa jeli salynyp, 3 myń shaqyrym jol jańǵyrtylyp jatqany týraly baıandaldy. Bıyl Dostyq-Moıynty ýchaskesindegi joldyń ekinshi bóligi jáne Almaty beketin aınalyp ótetin temir jol jelisiniń qurylysy aıaqtalady. Darbaza – Maqtaaral jobasyn iske asyrý jalǵasýda. Baqty – Aıagóz jáne Qyzyljar – Moıynty jelileriniń qurylysy bastaldy.
Memleket basshysyna termınal jelilerin keńeıtý jumystary júrgizilip jatqany jóninde málimet berildi. Qazaqstannyń Qytaı, Reseı, Majarstan, Belarýs, Ázerbaıjan jáne Grýzııa sııaqty elderdiń júk jınalatyn negizgi ortalyqtarymen qarym-qatynas jasaýy logıstıkany ońtaılandyryp, Shyǵys – Batys jáne Soltústik – Ońtústik baǵyttaryndaǵy tasymaldyń tıimdiligin arttyrady.
Kezdesýde sıfrlandyrý máselesine aıryqsha nazar aýdaryldy. Álemdik deńgeıdegi ınnovasııanyń kóshbasshylarymen birlesip, temirjol kóliginiń sapasyn jaqsartý jáne qaýipsizdigin qamtamasyz etý jumystary qolǵa alynǵan. Transkaspıı halyqaralyq kólik dálizindegi tranzıttik deklarasııalaýdy avtomattandyrý logıstıkalyq operasııalardyń ashyqtyǵyn qamtamasyz etip, júkti jetkizý merzimin jedeldetti. Deklarasııany resimdeý ýaqyty 8 saǵattan 30 mınýtqa deıin qysqardy.
Memleket basshysy Qazaqstannyń tranzıt áleýetin jáne ekonomıkasyn damytýda kompanııa úlken ról atqaratynyn atap ótip, kólik ınfraqurylymyn odan ári jańǵyrtýdyń mańyzyna toqtaldy.
