Baıraqty básekege Qazaqstannyń barlyq óńirlerinen, sonymen qatar Reseı, О́zbekstan, Qyrǵyzstan, Tájikstan jáne Ýkraınadan kelgen jas djıý-djıtsýshiler qatysty. Jalpy sany 200-den astam balýandar tatamıde baq synady.
Týrnır jasóspirimder arasynda salaýatty ómir saltyn nasıhattaý, sporttyq básekelestikti arttyrý jáne halyqaralyq yntymaqtastyqty nyǵaıtý maqsatynda uıymdastyrylǵan. Jarysqa halyqaralyq sanattaǵy kásibı tóreshiler shaqyrylǵan.
«AMANAT» partııasy, «Jastar Rýhy» jastarǵa tek bilim men jumys qana emes, sondaı-aq erik-jiger men tártipti dáripteýge baǵyttalǵan jan-jaqty jobalardy júzege asyrady. Atalǵan jarys – balalardy sport arqyly tárbıeleýdiń jarqyn úlgisi. Biz jarysqa qatysqan ár balanyń bolashaqta myqty azamat, eldiń tiregi bolaryna senemiz. Bul – partııanyń jastardy qoldaý jolyndaǵy naqty qadamy», – deıdi «Jastar Rýhy» Jastar qanatynyń tóraǵasy Aqerke Iskanderova.
Týrnırdi ótkizý týraly bastamany alǵash ret bıyl aqpan aıynda djıý-djıtsýdan qara belbeý ıegeri, Saǵadat batyr atyndaǵy sport klýbynyń negizin qalaýshy Nursultan Orynbasarov «AMANAT» partııasynyń Tóraǵasy Erlan Qoshanovpen ótken kezdesýde kótergen bolatyn. Sol sátte balalar men jasóspirimder arasynda salaýatty ómir saltyn nasıhattaý jáne buqaralyq sportty damytý maqsatynda arnaıy respýblıkalyq týrnır uıymdastyrý qajettigi aıtylǵan.
«Bul usynysty naqty qajettilikke súıene otyryp aıttyq. Sebebi, elimizde djıý-djıtsý sportymen aınalysatyn myńdaǵan jas sportshy bar, biraq olardyń sheberligin shyńdaıtyn, halyqaralyq deńgeıge shyǵaratyn alańdar jetkiliksiz. Búgin sol bastama naqty jobanyń negizine aınaldy. Biz bul týrnır arqyly tek chempıondardy emes, jaýapty azamattardy tárbıeleımiz. Bul – «AMANAT» partııasynyń el bolashaǵyna baǵyttalǵan aıqyn ustanymynyń kórinisi», – dedi Nursultan Orynbasarov.
О́z kezeginde «AMANAT» partııasy Almaty oblystyq fılıalynyń atqarýshy hatshysy Erlan Jaqypov jarystyń mańyzdylyǵyna toqtaldy. Onyń aıtýynsha, óńirde sporttyń kóptegen túri damyp keledi, olardyń arasynda djıý-djıtsý erekshe qarqynǵa ıe.
«Sońǵy jyldary Saǵadat Nurmaǵanbetov atyndaǵy sport klýby 5 myńǵa jýyq jas sportshyny tárbıeledi. Olardyń qatarynda álem chempıondary da bar. Bul – júıeli qoldaýdyń jáne jastardy sportqa tartýdyń naqty nátıjesi. Partııanyń saıası tuǵyrnamasynda halyq saýlyǵyna erekshe kóńil bólingen. Salaýatty ómir saltynyń kepili – sport. Sondyqtan buqaralyq sportty jáne kásibı sportty damytý – bizdiń basymdyqtarymyzdyń qatarynda. Djıý-djıtsý – óńirimizde qarqyndy damyp kele jatqan sport túri. Bul týrnırdiń jas urpaq tárbıesindegi róli zor», – dedi ol.
Jarys qorytyndysy boıynsha ár salmaq jáne jas sanatynda úzdik shyqqan sportshylar kýbokpen, medaldarmen jáne dıplomdarmen marapattaldy.
Aıta ketý kerek, týrnır Qazaqstan djıý-djıtsý qaýymdastyǵy, Almaty oblystyq djıý-djıtsý federasııasy, oblystyq dene shynyqtyrý jáne sport basqarmasy men Saǵadat Nurmaǵambetov atyndaǵy sport klýbynyń qoldaýymen ótti.
Uıymdastyrýshylardyń málimetinshe, «AMANAT JIU-JITSU KIDS CUP» jarysy aldaǵy jyldary dástúrli formatta jalǵasyn tabady.
Almaty oblysy.
