Fotolar: Úkimet, telegram
Jalpy jınaý alańy 23,6 mln gektardy quraıdy, onyń ishinde 16 mln gektary – dándi jáne dándi-burshaqty daqyldar. Sońǵy málimetter boıynsha, 1,1 mln gektar (dándi daqyldar egisiniń 6,6%-y) orylyp, 1,6 mln tonna astyq bastyrylǵan, 17,4 myń tonna maıly daqyl, 363,5 myń tonna kartop, 1,3 mln tonna kókónis jáne 1,6 mln tonna baqsha ónimderi jınalǵan.
Aýyl sharýashylyǵy taýar óndirýshileri topyraqqa 1,7 mln tonna tyńaıtqysh qosqan, bul jyldyq jospardyń (1,9 mln tonna) 88%-yn quraıdy. Barlyǵy 1,8 mln tonnaǵa kelisimshart jasalǵan, al qalǵan kólemdi kúzde – kúzgi jyrtý men parlarǵa engizý josparlanyp otyr
Aýyl sharýashylyǵy vıse-mınıstri Azat Sultanovtyń aıtýynsha, egin jınaıtyn tehnıkalardyń daıyndyq deńgeıi 93%-dy quraıdy, al jappaı jınaý kezeńinde ol 100%-ǵa jetkiziledi. Jumysqa 139 myń traktor, 31 myń kombaın, 17 myń shapqysh jáne 130 myń birlik basqa da tehnıka jumyldyrylmaq.
Egin jınaý jumystaryna 402 myń tonna arzandatylǵan dızel otyny bólingen, onyń 9,3 myń tonnasy (jospardyń 42%-y) sharýalarǵa jetkizildi. Janarmaı baǵasy naryqtan 18–20%-ǵa tómen.
Jańa ónimdi qabyldaý úshin elevatorlardan oryn bosatý máselesi jeke qaraldy. Qazirgi ýaqytta olardyń júktemesi 16%-dy quraıdy – bul jalpy syıymdylyǵy 30,7 mln tonnanyń (17,4 mln tonnasy – aýyl sharýashylyǵy taýar óndirýshilerinde, 13,3 mln tonnasy – lısenzııalanǵan astyq qabyldaý kásiporyndarynda) 2,2 mln tonnasy. Buǵan deıin «Azyq-túlik kelisimshart korporasııasy» tamyz aıynyń sońyna deıin keminde 500 myń tonna astyq ótkizý tapsyrylǵan bolatyn. Basqarma tóraǵasynyń birinshi orynbasary Ildar Ismaǵulovtyń málimetinshe, qazirgi tańda 328 myń tonnasy satyldy. Taıland, Parsy shyǵanaǵy elderi, Aýǵanstan, Ázerbaıjan jáne Aljırmen astyq jetkizý jóninde kelissózder júrgizilir jatyr. Premer-mınıstrdiń orynbasary – ulttyq ekonomıka mınıstri Serik Jumanǵarın qaldyq astyqty ótkizýdi jedeldetýdi tapsyrdy.
Sondaı-aq kóktemgi dala jáne jıyn-terim jumystaryna 5%-dyq jeńildetilgen nesıelendirý barysy qaraldy. Qarjylandyrý «Agrarlyq nesıe korporasııasy» AQ, ekinshi deńgeıli bankter, mıkroqarjy uıymdary, óńirlik ınvestısııalyq ortalyqtar, nesıelik seriktestikter jáne ÁKK arqyly júzege asyrylady. Barlyǵy 7 543 ótinim túsip, 499,4 mlrd teńge suraldy, onyń ishinde 7 485 sharýashylyqqa 490,1 mlrd teńge qarjy berilip, 7,8 mln gektar egistik qamtyldy.
Sýarmaly sýmen qamtamasyz etý jaǵdaıy turaqty. Almaty jáne Jetisý oblystarynda vegetasııalyq kezeń qaýipsiz ótip jatyr, Jambyl oblysynda Shý jáne Talas ózenderi boıynsha sý berý kestege saı júrgizilip jatyr. Aýyldyq okrýgterde baqsha ónimderin jınaý aıaqtalyp, sýarýǵa degen qajettilik azaıdy.
Otyrys sońynda vıse-premer ońtústik jáne negizgi astyq óndirýshi óńirlerdiń ókilderin tyńdady. Jappaı egin jınaý bastalǵannan keıin shtab otyrystary apta saıyn ótkizilip, týyndaıtyn máseleler jedel sheshiletin bolady.
